ഇത്തവണത്തെ ഓണം തീ പാറുന്ന പോരാട്ടത്തിനാണ് സാക്‍ഷ്യം വഹിക്കാന്‍ പോകുന്നത്. മമ്മൂട്ടി - മോഹന്‍ലാല്‍ യുദ്ധം തന്നെയാണ് പ്രേക്ഷകരെ കാത്തിരിക്കുന്നത്. ലാല്‍ ജോസ് സംവിധാനം ചെയ്യുന്ന മോഹന്‍ലാല്‍ ചിത്രവും അജയ് വാസുദേവ് സംവിധാനം ചെയ്യുന്ന മമ്മൂട്ടിച്ചിത്രവും ഓണത്തിന് ഏറ്റുമുട്ടും.

ലാല്‍ ജോസ് ചിത്രത്തില്‍ മോഹന്‍ലാല്‍ ഒരു കോളജിലെ വൈസ് പ്രിന്‍സിപ്പലായാണ് അഭിനയിക്കുന്നത്. വിദ്യാര്‍ത്ഥികളുമായി വളരെ സൌഹൃദത്തില്‍ പെരുമാറുന്ന സ്നേഹസമ്പന്നനായ അധ്യാപകനാണ് മോഹന്‍ലാല്‍ ഈ സിനിമയില്‍ അവതരിപ്പിക്കുന്ന മൈക്കിള്‍ ഇടിക്കുള. ബെന്നി പി നായരമ്പലമാണ് തിരക്കഥ.

എന്നാല്‍ സമാനതകളേറെയുണ്ടെങ്കിലും മോഹന്‍ലാലിന്‍റെ കഥാപാത്രവുമായി തീര്‍ത്തും വിപരീത സ്വഭാവ വിശേഷങ്ങളുള്ള എഡ്വേര്‍ഡ് ലിംവിംഗ്സ്റ്റണ്‍ എന്ന കോളജ് പ്രൊഫസറെയാണ് ‘എഡ്ഡി’ എന്ന ചിത്രത്തില്‍ മമ്മൂട്ടി അവതരിപ്പിക്കുന്നത്. തനി ചട്ടമ്പിയായ ഒരു കോളജ് പ്രൊഫസര്‍. ഉദയ്കൃഷ്ണയാണ് തിരക്കഥ.

മോഹന്‍ലാല്‍ ചിത്രത്തില്‍ ഒരു സുപ്രധാന കഥാപാത്രത്തെ അനൂപ് മേനോന്‍ അവതരിപ്പിക്കുന്നു. കനല്‍, മുന്തിരിവള്ളികള്‍ തളിര്‍ക്കുമ്പോള്‍ എന്നീ സിനിമകള്‍ക്ക് ശേഷം മോഹന്‍ലാലും അനൂപ് മേനോനും ഒന്നിക്കുന്ന ചിത്രം കൂടിയാണിത്.

മമ്മൂട്ടിക്കൊപ്പം എഡ്ഡിയില്‍ സന്തോഷ് പണ്ഡിറ്റ് അഭിനയിക്കുന്നുണ്ട്. ഉണ്ണി മുകുന്ദനും ഒരു പ്രധാന താരമാണ്.

എന്തായാലും കാമ്പസ് പശ്ചാത്തലത്തിലൊരുങ്ങുന്ന രണ്ട് സിനിമകളും ഒരുമിച്ച് വരുമ്പോള്‍ ആര് കൂടുതല്‍ സ്കോര്‍ ചെയ്യും എന്നത് കാത്തിരുന്ന് കാണുകതന്നെ!