മേജര്‍ രവിയുടെ അടുത്ത ചിത്രത്തില്‍ നായകനായി നിവിന്‍ പോളി എത്തുന്നു. മേജര്‍ രവി പരീക്ഷിക്കാത്ത മേഖലയായ റൊമാന്റിക്കാണ് ചിത്രത്തിന്റെ കഥതന്തുയെന്നാണ് റിപ്പോര്‍ട്ടുകള്‍. നിവിന്‍ പോളിയെ നായകനാക്കി ഒരുക്കുന്ന ഈ ചിത്രം യഥാര്‍ത്ഥ സംഭവത്തെ ആസ്പദമാക്കിയുള്ള പ്രണയ ചിത്രമാണെന്നും പറയുന്നു. അതേസമയം ചിത്രത്തിന്റെ തിരക്കഥ പൂര്‍ത്തിയായിട്ടില്ലെന്നും ഈ വര്‍ഷം അവസാനത്തോടെ മാത്രമേ ചിത്രീകരണം ആരംഭിക്കുകയുള്ളൂയെന്നുമാണ് പുറത്തുവരുന്ന റിപ്പോര്‍ട്ടുകള്‍.

ഇനിയും പേര് തീരുമാനിച്ചിട്ടില്ലാത്ത ഈ ചിത്രത്തിലൂടെ ജോമോന്‍ ടി ജോണ്‍ നിര്‍മാതാവായി തുടക്കം കുറിയ്ക്കുകയാണ്. നിര്‍മാണത്തിനു പുറാമേ ചിത്രത്തിന്റെ ഛായാഗ്രാഹണം നിര്‍വ്വഹിയ്ക്കുന്നതും ജോമോന്‍ തന്നെയാണെന്നാണ് വിവരം. ഗോപി സുന്ദറാണ് ചിത്രത്തിന് സംഗീത സംവിധാനം നിര്‍വ്വഹിയ്ക്കുന്നത്. നിവിന്റെ നായികയായി അഭിനയിക്കുന്നത് ഒരു പുതുമുഖ നടിയായിരിക്കുമെന്നും റിപ്പോര്‍ട്ടുകള്‍ പറയുന്നു.

മോഹന്‍ലാല്‍ അല്ലാതെ മേജര്‍ രവി ചിത്രത്തില്‍ എത്തുന്ന മൂന്നാമത്തെ നായകനാണ് നിവിന്‍ പോളി. മോഹന്‍ലാലിനെ നായകനാക്കി ഏറെ പ്രതീക്ഷയോടെ വന്ന 1971 ബിയോണ്ട് ബോര്‍ഡേഴ്‌സ് വന്‍ പരാജയമായതോടെയാണ് സ്ഥിരം നായകനായ ലാലിനെ മാറ്റി പരീക്ഷിക്കാന്‍ മേജര്‍ രവി ഒരുങ്ങുന്നതെന്നാണ് പലരും ചോദിക്കുന്നത്.