സിനിമാതാരങ്ങള്‍ക്ക് ടെന്‍ഷന്‍ ഉണ്ടാകുന്നത് സ്വാഭാവികം. ഡേറ്റ് ക്ലാഷുകള്‍ ഉണ്ടാകുമ്പോഴും സിനിമകള്‍ വിജയിക്കാതെയാകുമ്പോഴും ടെന്‍ഷന്‍ കൂടും. നടന്‍ വെറും നടന്‍ മാത്രമല്ല, നിര്‍മ്മാതാവ് കൂടിയാണെങ്കിലോ? പിന്നത്തെ കാര്യം പറയേണ്ടതില്ല.
നിര്‍മ്മാതാവ് കൂടിയായ ഒരു യുവതാരത്തിന് കോപം നിയന്ത്രിക്കാന്‍ കഴിയുന്നില്ല എന്നതാണ് പുതിയ വാര്‍ത്ത. കോപാധിക്യം കാരണം പല അനിഷ്ട സംഭവങ്ങള്‍ക്കും ഷൂട്ടിംഗ് സെറ്റുകളില്‍ ഈ നടന്‍ കാരണമാകുന്നുണ്ടത്രേ. കഴിഞ്ഞ ദിവസം ഒരു ലക്ഷത്തോളം രൂപ വിലയുള്ള തന്‍റെ മൊബൈല്‍ ഫോണ്‍ തറയിലെറിഞ്ഞുടച്ചാണ് ഈ യുവതാരം കോപം ശമിപ്പിച്ചത്.
തമിഴ് യുവ സൂപ്പര്‍താരം വിശാല് ആണ് ഷൂട്ടിംഗ് സെറ്റുകളില്‍ നിരന്തരം കോപാകുലനാകുന്നത്. താന്‍ നിര്‍മ്മിച്ച് നായകനാകുന്ന ‘പാണ്ഡ്യനാട്’ എന്ന സിനിമയുടെ ലൊക്കേഷനില്‍ വച്ചാണ് വിശാല് മൊബൈല്‍ എറിഞ്ഞുടച്ചത്.
ബി പി കൂടിയതിനാല്‍ അടുത്തിടെ വിശാലിന് ആശുപത്രിവാസം വരെ വേണ്ടിവന്നിരുന്നു. എന്തായാലും വിശാല് അഭിനയിക്കുന്ന സിനിമകളുടെ ലൊക്കേഷനുകളില്‍ താരത്തോട് സംസാരിക്കുകയും പെരുമാറുകയും ചെയ്യുന്നവര്‍ അല്‍പ്പം സൂക്ഷിക്കുന്നത് നന്നായിരിക്കുമെന്നാണ് തമിഴ് സിനിമാ പണ്ഡിതര്‍ അഭിപ്രായപ്പെടുന്നത്.
