ഷൂട്ടിംഗ് ലൊക്കേഷനിലേക്ക് കാറില്‍ പോകുമ്പോള്‍ കടന്നുപിടിച്ചുവെന്ന പരാതിയില്‍ മണിയന്‍പിള്ള രാജുവിനെതിരെ കേസെടുത്ത് പീരുമേട് പോലീസ്. കാറില്‍ യാത്ര ചെയ്യവേ ലൈംഗിക ചുവടെ സംസാരിച്ചുവെന്നും ശരീരത്തില്‍ കടന്നു പിടിച്ചു എന്നുമാണ് ആലുവ സ്വദേശിയായ നടിയുടെ പരാതി. 2009 കുട്ടിക്കാനത്ത് നിന്ന് ലൊക്കേഷനിലേക്ക് മണിയന്‍പിള്ള രാജുവിനൊപ്പം കാറില്‍ പോകവെയാണ് സംഭവം ഉണ്ടായതെന്ന് നടി പറയുന്നു. രണ്ടുദിവസം മുമ്പാണ് മുകേഷ് ഉള്‍പ്പെടെയുള്ള നടന്മാര്‍ക്കെതിരായ പീഡന പരാതി താന്‍ പിന്‍വലിക്കുന്നില്ലെന്ന് നടി വ്യക്തമാക്കിയത്.

നേരത്തെ നടിക്കെതിരെ പോലീസ് പോക്‌സോ കേസ് എടുത്തിരുന്നു. പിന്നാലെയാണ് കേസില്‍ നിന്ന് പിന്‍വാങ്ങുന്നതായി നടി അറിയിച്ചത്. തനിക്കെതിരെ വന്ന പോക്‌സോ കേസ് വ്യാജമാണെന്നും സര്‍ക്കാര്‍ ഇതില്‍ കൃത്യമായ അന്വേഷണം നടത്തുന്നില്ലെന്നും നടി ആരോപിച്ചിരുന്നു. പിന്നാലെ തല്‍ക്കാലം കേസില്‍ നിന്ന് പിന്നോട്ടില്ലെന്നു വ്യക്തമാക്കി നടി രംഗത്തെത്തുകയായിരുന്നു.