വിനീത് ശ്രീനിവാസന്‍ സംവിധാനം ചെയ്യുന്ന 'വര്‍ഷങ്ങള്‍ക്കു ശേഷം' റിലീസിന് ഇനി അധികം കാത്തിരിക്കേണ്ടി വരില്ല. പ്രണവ് മോഹന്‍ലാല്‍ ആരാധകരും ആവേശത്തിലാണ്. ധ്യാന്‍ ശ്രീനിവാസനും പ്രണവ് മോഹന്‍ലാലുമാണ് പ്രധാന കഥാപാത്രങ്ങളെ അവതരിപ്പിക്കുന്നത്. ഹൃദയത്തിനുശേഷം മെറിലാന്‍ഡ് സിനിമാസിന്റെ ബാനറില്‍ വിശാഖ് സുബ്രഹ്‌മണ്യം നിര്‍മ്മിച്ച ചിത്രത്തില്‍ പ്രണവിനൊപ്പം അഭിനയിച്ച അനുഭവം പങ്കുവെച്ചിരിക്കുകയാണ് ധ്യാന്‍ ശ്രീനിവാസന്‍.

പ്രണവിന് മലയാളം എഴുതുവാനും വായിക്കാനും ബുദ്ധിമുട്ടുണ്ടെന്നും എന്നാല്‍ ചിത്രത്തിന്റെ സ്‌ക്രിപ്റ്റ് പ്രണവിന് കാണാപാഠമാണെന്നും ധ്യാന്‍ പറയുന്നു. പ്രണവ് ഇംഗ്ലീഷിലാണ് പഠിച്ചതെന്നും തന്റെ ഡയലോഗുകള്‍ അടക്കം താരത്തിന് അറിയാമെന്നും ധ്യാന്‍ പറഞ്ഞു.

'മലയാളം എഴുതാനും വായിക്കാനും അറിയാത്ത ഒരു ബുദ്ധിമുട്ടുണ്ട്. പക്ഷേ സ്‌ക്രിപ്റ്റ് അവന് കാണാപാഠമാണ്. പുള്ളിക്കാരന്റെ അടുത്ത് ഇംഗ്ലീഷില്‍ ഒരു സ്‌ക്രിപ്റ്റ് ഉണ്ട്. അതിലുള്ള എന്റെ ഡയലോഗ് അടക്കം അവന് കാണാതെ അറിയാം. അവന്‍ അതിന്റെ മുകളില്‍ വര്‍ക്ക് ചെയ്തിട്ടുണ്ട്. കാരണം ഒന്ന് രണ്ട് വര്‍ഷം കൂടുമ്പോഴാണ് അവന്‍ സിനിമ ചെയ്യുന്നത്. പുള്ളി എല്ലാം പഠിച്ച് വന്ന് ചെയ്യുകയാണ്. അതുകൊണ്ടുതന്നെ അതിന്റേതായ ബുദ്ധിമുട്ടുണ്ട്. ഞാന്‍ ഓരോ സിനിമകള്‍ ചെയ്തുവന്ന് അവസാനമാണ് അവിടെ വന്ന് ജോയിന്‍ ചെയ്തത്'-ധ്യാന്‍ ശ്രീനിവാസന്‍ പറഞ്ഞു.