ടൊവിനോ തോമസ് നായകനായെത്തിയ തല്ലുമാല ബോക്സോഫീസിൽ തരംഗം തീർക്കുകയാണ്. മുഴുനീള അടിപ്പടമായ ചിത്രം പുറത്തുവന്നതോടെ ടൊവിനോയ്ക്കൊപ്പം വാർത്തകളിൽ നിറഞ്ഞുനിൽക്കുകയാണ് ആൻ്റണി വർഗീസും. ടൊവിനോയും പിള്ളേരും ഇടിയുടെ മാലപ്പടക്കം തീർക്കുമ്പോൾ മലയാള അടിപ്പട സിനിമയുടെ പുതിയ മുഖമായ പെപ്പേ എന്ന ആൻ്റണി വർഗീസ് എവിടെ പോയെന്നാണ് ആരാധകരുടെ ചോദ്യം.

ഇപ്പോഴിതാ അടികൂടാൻ ടൊവിനോയ്ക്ക് ഉപദേശവുമായി രംഗത്ത് വന്നിരിക്കുകയാണ് ആൻ്റണി വർഗീസ്. തല്ലുകൂടി ഹിറ്റടിച്ച്... എതിരെ ഇടിക്കാൻ വരുന്നവൻ്റെ ഉള്ളൊന്ന് അറിഞ്ഞാൽ തീരാവുന്ന പ്രശ്നമേ ഉള്ളുട്ടോ ടൊവി ബ്രോ, അതോണ്ടല്ലേ ഇടിക്കാൻ നിന്നവൻ്റെ കൂടെ നിന്നവനെ ഞാൻ ആദ്യം ഇടിച്ചത് എന്ന് താരം തൻ്റെ ഫേയ്സ്ബുക്ക് പേജിൽ കുറിച്ചു.

പോസ്റ്റിന് മറുപടിയുമായി ഉടൻ തന്നെ ടൊവിനോയും രംഗത്തെത്തി. തലൈവരേ നീങ്കളാ എന്നാണ് ടൊവിനോയുടെ കമൻ്റ്. പിന്നാലെ ആൻ്റണി പടത്തിൽ അവസരം കിട്ടാത്തതിൽ നല്ല വിഷമമുണ്ടല്ലേ എന്നിങ്ങനെ കമൻ്റുകളുമായി ആരാധകരും രംഗത്തെത്തി. ടൊവിനോ,ഷൈൻ ടോം ചാക്കോ,ലുക്മാൻ,കല്യാണി പ്രിയദർശൻ എന്നിവരണിനിരന്ന ചിത്രം ഖാലിദ് റഹ്മാനാണ് സംവിധാനം ചെയ്തത്.