അമല്‍ നീരദരിന്‍റെ ആദ്യചിത്രം മമ്മൂട്ടി നായകനായ ബിഗ്ബി ആയിരുന്നു. ആ സിനിമ മമ്മൂട്ടിയുടെ ഏറ്റവും സ്റ്റൈലിഷ് സിനിമകളുടെ ഗണത്തിലാണ് ഉള്‍പ്പെട്ടിരിക്കുന്നത്.

അതിന് ശേഷം അമല്‍ നീരദ് മികച്ച കുറച്ച് സിനിമകള്‍ സംവിധാനം ചെയ്തു. കഴിഞ്ഞ വാരം വന്ന വലിയ വാര്‍ത്ത മമ്മൂട്ടിയും അമല്‍ നീരദും വീണ്ടും ഒന്നിക്കുന്നു എന്നായിരുന്നു.

‘കുഞ്ഞാലിമരയ്ക്കാര്‍’ എന്ന പ്രൊജക്ടിനെക്കുറിച്ചായിരുന്നു അത്. എന്നാല്‍ ഇപ്പോള്‍ അറിയുന്നത് ആ സിനിമ അമല്‍ നീരദ് ചെയ്യുന്നില്ല എന്നാണ്. കുറച്ചുകാലം മുമ്പ് ആ പ്രൊജക്ടിനെക്കുറിച്ച് ആലോചിച്ചിരുന്നു എന്നും എന്നാല്‍ ഇപ്പോള്‍ അങ്ങനെ ഒരു ചിന്ത ഇല്ലെന്നുമാണ് അമല്‍ നീരദ് വ്യക്തമാക്കിയിരിക്കുന്നത്.

എന്നാല്‍ അമല്‍ നീരദ് ഇല്ലെങ്കിലും കുഞ്ഞാലിമരയ്ക്കാര്‍ എന്ന പ്രൊജക്ട് ഓണില്‍ തന്നെയാണ്. ഗ്രേറ്റ്ഫാദറിന് ശേഷം ആഗസ്റ്റ് സിനിമാസിന്‍റെ മമ്മൂട്ടിച്ചിത്രം ആയിരിക്കും ഇത്. സന്തോഷ് ശിവന്‍ ക്യാമറ ചലിപ്പിക്കും. ശങ്കര്‍ രാമകൃഷ്ണനാണ് തിരക്കഥ. ഒരുപക്ഷേ, ശങ്കര്‍ രാമകൃഷ്ണന്‍ തന്നെ സംവിധായകന്‍റെ തൊപ്പിയും അണിഞ്ഞുകൂടായ്കയില്ല.