മലയാള സിനിമാതാരങ്ങളുടെ ടീമായ കേരള സ്ട്രൈക്കേഴ്സിന്റെ സൂപ്പര്‍താരമാണ് രാജീവ് പിള്ള. അര്‍ദ്ധസെഞ്ച്വറി പ്രകടനങ്ങളുമായി കേരള സ്ട്രൈക്കേഴ്സിനെ ജയിപ്പിച്ച രാജീവ് പിള്ള ഇപ്പോള്‍ ബോളിവുഡില്‍ അഭിനയിക്കാന്‍ ഒരുങ്ങുകയാണ്. ഇതിനിടയിലാണ് നടി ഭാവനയുമായി രാജീവ് പിള്ള പ്രണയത്തിലാണെന്ന വാര്‍ത്തകള്‍ പരക്കുന്നത്. എന്നാല്‍ ഇക്കാര്യം നിഷേധിച്ചിരിക്കുകയാണ് രാജീവ് പിള്ള.
കേരള സ്ട്രൈക്കേഴ്സിന്റെ അംബാസഡറാണ് ഭാവന. ക്രിക്കറ്റ് മത്സരങ്ങളില്‍ തിളങ്ങിയ രാജീവ് പിള്ളയും ഭാവനും പ്രണയത്തിലായെന്നായിരുന്നു റിപ്പോര്‍ട്ട്. ഒരു മത്സരത്തിനിടയില്‍ രാജീവിന് പരുക്കേറ്റപ്പോള്‍ ഭാവന അതീവ ശ്രദ്ധപുലര്‍ത്തിയെന്നും റിപ്പോര്‍ട്ടുണ്ടായിരുന്നു. മുംബൈ ഹീറോസിനെതിരെ അര്‍ദ്ധ സെഞ്ച്വറി നേടി കേരള സ്ട്രൈക്കേഴ്സിനെ ജയിപ്പിച്ച രാജേഷ് പിള്ളയ്ക്ക് പ്രിയദര്‍ശന്‍ ബോളിവുഡില്‍ ഒരു വേഷം വാഗ്ദാനം ചെയ്തിരുന്നു. ഈ ചിത്രത്തില്‍ നടി ഭാവനയ്ക്ക് വേണ്ടി രാജീവ് പിള്ള ശുപാര്‍ശ നടത്തിയെന്നും റിപ്പോര്‍ട്ടുണ്ടായിരുന്നു.
എന്നാല്‍ ഈ വാര്‍ത്തകള്‍ക്കെതിരെ രൂക്ഷമായി പ്രതികരിച്ച് രാജീവ് പിള്ള രംഗത്തെത്തിയിരിക്കുന്നു. ആരാണ് ഈ അസംബന്ധങ്ങള്‍ക്ക് പിന്നിലെന്ന് അറിയില്ല. ഇതില്‍ എന്തെങ്കിലും സത്യമുണ്ടോയെന്ന് എന്നോട് ചോദിക്കാതെ തെറ്റായ വാര്‍ത്ത നല്‍കിയ മാധ്യമങ്ങള്‍ക്കെതിരെ ഞാന്‍ നിയമത്തെ സമീപിക്കും. ക്രിക്കറ്റ് മത്സരത്തിനിടയില്‍ ഞാന്‍ ഭാവനയോട് മാത്രമായി സംസാരിച്ചെന്ന് അവിടെയുണ്ടായിരുന്ന ആര്‍ക്കെങ്കിലും പറയാനാകുമോ? എനിക്ക് പരുക്കേറ്റപ്പോള്‍ ഭാവന മാത്രമല്ല ശ്രദ്ധിച്ചത്. മോഹന്‍‌ലാല്‍ അടക്കമുള്ള ടീം എന്റെ പരുക്കില്‍ പ്രയാസപ്പെട്ടിരുന്നു- രാജീവ് പിള്ള പറഞ്ഞു.
എനിക്ക് പ്രിയദര്‍ശന്‍ ഒരു വേഷം തന്നു. അക്കാര്യത്തില്‍ പ്രിയദര്‍ശനോട് നന്ദിയുണ്ട്. എന്നാല്‍ ആര്‍ക്കെങ്കിലും വേണ്ടി ശുപാര്‍ശ ചെയ്യാന്‍ മാത്രം വലിയ താരമല്ല ഞാന്‍- രാജീവ് പിള്ള പറഞ്ഞു.
