Last Updated:
ബുധന്‍, 24 സെപ്‌റ്റംബര്‍ 2014 (14:38 IST)
തമിഴ് സിനിമാലോകത്തെ പിടിച്ചുകുലുക്കിയിരിക്കുകയാണ് 'അഞ്ചാന്‍' എന്ന ആക്ഷന്‍ ത്രില്ലറിന്‍റെ പരാജയം.
സൂര്യ എന്ന സൂപ്പര്‍താരത്തിന്‍റെ ഏറ്റവും ഇനിഷ്യല്‍ കളക്ഷന്‍ നേടിയ സിനിമ പക്ഷേ ദിവസങ്ങള്‍ക്കുള്ളില്‍ മൂക്കും കുത്തി വീണു. സോഷ്യല്‍ മീഡിയയില്‍ സൂര്യ ആരാധകര്‍ ലിങ്കുസാമിയെ കളിയാക്കി തകര്‍ക്കുകയാണ് ഇപ്പോള്‍.
അഞ്ചാന്‍റെ ത്രില്ലും ആവേശവും ഉള്‍ക്കൊണ്ട് താനും വ്യക്തിപരമായി അങ്ങനെ ട്യൂണ്‍ ആയെന്നും ഇതുവരെ സിനിമാലോകത്തുനിന്ന് പഠിച്ച അറിവെല്ലാം താന്‍ അഞ്ചാനില്‍ പ്രയോഗിച്ചു എന്നുമെല്ലാം അഭിമുഖങ്ങള്‍ ലിങ്കുസാമി പറഞ്ഞിരുന്നു. സിനിമ പരാജയമായപ്പോള്‍ ലിങ്കുസാമിയുടെ ഈ ഡയലോഗുകളെല്ലാം ഉപയോഗിച്ച് അദ്ദേഹത്തിനെതിരെ ആക്രമം അഴിച്ചുവിട്ടിരിക്കുകയാണ് സോഷ്യല്‍ മീഡിയയിലൂടെ സൂര്യ ആരാധകര്‍.
എന്തായാലും പരാജയത്തില്‍ പതറി നില്‍ക്കാനൊന്നും ലിങ്കുസാമി തയ്യാറല്ല. തന്‍റെ അടുത്ത ചിത്രത്തിന്‍റെ ജോലികളിലേക്ക് അദ്ദേഹം കടന്നിരിക്കുന്നു. അജിത്തിനെ നായകനാക്കി ഒരു സിനിമ നിര്‍മ്മിക്കാനൊരുങ്ങുകയാണ് ലിങ്കുസാമി. അജിത്തിന്‍റെ 'വീരം' ഒരുക്കിയ ശിവയാണ് ഈ ചിത്രം സംവിധാനം ചെയ്യുന്നത്.
തിരുപ്പതി ബ്രദേഴ്സിന്‍റെ സമീപകാലത്തെ ഏറ്റവും വലിയ പ്രൊജക്ടായിരിക്കും അജിത് - ശിവ സിനിമ. ഒരു സൂപ്പര്‍ ആക്ഷന്‍ ത്രില്ലറിനാണ് ഈ ടീം ഒന്നിക്കുന്നത്. ശിവ തന്നെയാണ് ചിത്രത്തിന് തിരക്കഥ രചിക്കുന്നത്.
2000ല്‍ അജിത്തിനെ നായകനാക്കി 'ജി' എന്ന സിനിമ സംവിധാനം ചെയ്തിരുന്നു ലിങ്കുസാമി. എന്നാല്‍ ആ സിനിമ പരാജയമായിരുന്നു.
