Last Updated:
വ്യാഴം, 31 മാര്‍ച്ച് 2016 (20:27 IST)
ട്വന്‍റി20 ലോകകപ്പ് രണ്ടാം സെമി ഫൈനലില്‍ ഇന്ത്യയുടെ രണ്ടാമത്തെ വിക്കറ്റ് നഷ്ടമായി. 40 റണ്‍സെടുത്ത അജിന്‍‌ക്യ രഹാനെയാണ് പുറത്തായത്. ശിഖര്‍ ധവാന് പകരം അജിന്‍‌ക്യ രഹാനെയാണ് രോഹിത് ശര്‍മയ്ക്കൊപ്പം ഓപ്പണ്‍ ചെയ്തത്. രോഹിത് ശര്‍മ തകര്‍ത്തടിച്ചുവെങ്കിലും പെട്ടെന്ന് പുറത്തായി. പകരമെത്തിയ വിരാട് കൊഹ്‌ലി രണ്ടുതവണ പുറത്താകലില്‍ നിന്ന് കഷ്ടിച്ച് രക്ഷപ്പെട്ടു. കൊഹ്‌ലിക്കൊപ്പം ഉറച്ചുനിന്ന രഹാനെ ബ്രാവോയ്ക്ക് ബൌണ്ടറി ലൈനില്‍ ക്യാച്ച് നല്‍കിയാണ് പുറത്തായത്. ഇപ്പോള്‍ പതിനാറാം ഓവറില്‍ രണ്ട് വിക്കറ്റ് നഷ്ടത്തില്‍ 130 ആണ് ഇന്ത്യയുടെ സ്കോര്.
കൊഹ്‌ലി വന്ന് നിലയുറപ്പിക്കുന്നതിന് മുമ്പ് രണ്ട് റണ്‍‌ഔട്ട് സാധ്യതകളില്‍ നിന്നാണ് രക്ഷപ്പെട്ടത്. വിന്‍‌ഡീസ് ഫീല്‍ഡര്‍മാര്‍ ഇതിന് കനത്ത വില നല്‍കേണ്ടി വരുമെന്ന രീതിയിലാണ് ഇപ്പോള്‍ കൊഹ്‌ലി കളിച്ചുകൊണ്ടിരിക്കുന്നത്.
സമീപകാലത്തൊന്നും ഇല്ലാത്ത മികച്ച ഓപ്പണിംഗാണ് ഇന്ത്യയ്ക്ക് ലഭിച്ചത്. ആറ് ഓവറുകള്‍ പിന്നിട്ടപ്പോള്‍
ഇന്ത്യ 60 റണ്‍സ് പിന്നിട്ടു. റസലിന്‍റെ ഒരോവറില്‍ രണ്ട് സിക്സറുകള്‍ പറത്തി മത്സരം ശര്‍മ ആവേശത്തിലാക്കി. ഉജ്ജ്വലമായ പിന്തുണയാണ് രഹാനെ നല്‍കിയത്. ബദ്രിയാണ് ശര്‍മയെ വിക്കറ്റിന് മുന്നില്‍ കുടുക്കിയത്. 31 പന്തുകളില്‍ 43 റണ്‍സാണ് ശര്‍മയുടെ സമ്പാദ്യം.
ടോസ് നേടിയ വെസ്റ്റിന്‍ഡീസ് ബൌളിംഗ് തെരഞ്ഞെടുക്കുകയായിരുന്നു. കരുതലോടെയാണ് ഇന്ത്യന്‍ ഇന്നിംഗ്സ് ആരംഭിച്ചത്. വലിയ സ്കോര് നേടുക എന്നതുതന്നെയാണ് ലക്‍ഷ്യം. ഇന്ന് ജയിക്കുന്നവര്‍ ഫൈനലില്‍ ഇംഗ്ലണ്ടിനെ നേരിടും.
