ലോകക്രിക്കറ്റിൽ സച്ചിനോളം മികച്ചവനാണോ കോലി എന്ന ചോദ്യം പലകുറി ആവർത്തിക്കപ്പെട്ടിട്ടുള്ളതാണ്. നീണ്ട 24 വർഷങ്ങൾ കൊണ്ട് സച്ചിൻ സ്വന്തമാക്കിയ പലറെക്കോഡുകളും 12 വർഷത്തി‌നുള്ളിൽ കോലി നേടിയെങ്കിലും ഇന്നും സച്ചിന് മുകളിൽ കോലിയെ സ്ഥാപിക്കാൻ ഒരു സാധാരണ ക്രിക്കറ്റ് ആരാധകന് സാധിച്ചേക്കില്ല.

3 ഫോർമാറ്റുകളിലും ഏറെകാലം ലോക ഒന്നാംനമ്പർ താരമായി തിളങ്ങിനിന്ന കോലിയുടെ സുവർണകാലമെന്ന് പറയുന്നത് 2016 മുതൽ 2019 വരെയുള്ള കാലഘട്ടമാണ്. ഒരു പക്ഷേ സച്ചിനും വിരാട് കോലിക്ക് തന്നെയും ഇനി ഒരിക്കലും നേടാൻ സാധിക്കാത്ത കാര്യങ്ങളാണ് കോലി ഈ സമയത്ത് നേടിയത്. ലോകം കോലിയെ കിംഗ് കോലി എന്ന് അംഗീകരിക്കുന്നതും ഇക്കാലത്ത് തന്നെ.

ഏകദിനത്തിന്റെ കാര്യമെടുക്കുകയാണെങ്കിൽ കോലി ആകെ നേടിയ 43 സെഞ്ചുറികളിൽ 20 സെഞ്ചുറികളാണ് ഈ നാലുവർഷത്തിൽ പിറന്നത്. 2016ൽ 92.38 ശരാശരിയിൽ 3 സെഞ്ചുറികളോട് 739 റൺസ്. 2017ൽ 76.38 ശരാശരിയിൽ 6 സെഞ്ചുറികൾ ഉൾപ്പടെ 1460 റൺസ്. 2018ൽ 133.56 ശരാശരിയിൽ 6 സെഞ്ചുറികളുൾപ്പടെ 1202 റൺസ്. 2019ൽ 59.87 ശരാശരിയിൽ 5 സെഞ്ചുറികളുൾപ്പടെ 1377 റൺസ്.

ഇനി ടെസ്റ്റ് ക്രിക്കറ്റിന്റെ കാര്യമെടുത്താൽ തന്റെ 27 ടെസ്റ്റ് സെഞ്ചുറികളിൽ 16 സെഞ്ചുറികളും പിറന്നത് ഈ കാലയളവിലാണെന്ന് കാണാം. തന്റെ കരിയറിൽ ആകെ നേടിയ ടെസ്റ്റ് സെഞ്ചുറികളിൽ പകുതിയിലധികവും. 2016ൽ 75.94 ശരാശരിയിൽ 1215 റൺസ്. 2017ൽ 75.64ശരാശരിയിൽ 1059 റൺസ്. 2018ൽ 55.08 ശരാശരിയിൽ 1322 റൺസ്. 2019ൽ 63.29 ശരാശരിയിൽ 612 റൺസ് എന്നിങ്ങനെയാണ് കോലിയുടെ നേട്ടം.