ദക്ഷിണാഫ്രിക്കക്കെതിരായ ടി20 പരമ്പരയിലെ രണ്ടാമത്തെ മത്സരത്തിലേറ്റ തോല്‍വിക്ക് പിന്നിലെ കാരണങ്ങള്‍ വിശദമാക്കി ഇന്ത്യന്‍ നായകന്‍ സൂര്യകുമാര്‍ യാദവ്. ഇന്ത്യന്‍ ഇന്നിങ്ങ്‌സ് കഴിഞ്ഞപ്പോള്‍ ദക്ഷിണാഫ്രിക്കക്കെതിരെ മികച്ച ടോട്ടലാണ് ടീം നേടിയതെന്നാണ് കരുതിയതെന്ന് സൂര്യകുമാര്‍ പറഞ്ഞു.

മികച്ച ടോട്ടല്‍ നമ്മള്‍ നേടിയെന്നാണ് കരുതിയത്. എന്നാല്‍ ആദ്യ ഓവറുകളില്‍ ദക്ഷിണാഫ്രിക്ക ബാറ്റ് ചെയ്ത രീതി കളിയെ മാറ്റിമറിച്ചു. ഒന്നാം വിക്കറ്റ് നഷ്ടമാവുമ്പോള്‍ 2.5 ഓവറില്‍ 42 റണ്‍സെന്ന നിലയിലായിരുന്നു ദക്ഷിണാഫ്രിക്ക. ഈ മികച്ച തുടക്കം ചെയ്‌സിംഗ് എളുപ്പമാക്കാന്‍ ദക്ഷിണാഫ്രിക്കയെ സഹായിച്ചു. വൈറ്റ് ബോള്‍ കൊണ്ട് പന്തെറിയുന്നത് പ്രയാസമായിരുന്നുവെന്നും എന്നാല്‍ ഇത്തരം സാഹചര്യങ്ങള്‍ ഭാവിയിലും ഉണ്ടാകുമെന്നതിനാല്‍ ഇത് മികച്ച പാഠമായിരുനുവെന്നും ഇന്ത്യന്‍ നായകന്‍ വ്യക്തമാക്കി.