ലോകകപ്പ് നേടുകയാണ് ഇന്ത്യൻ ടീമിന്റെ ഏറ്റവും വലിയ ലക്ഷ്യമെന്ന് കോച്ച് രവിശാസ്ത്രി. ഏത് സാഹചര്യത്തേയും നേരിടാൻ നിലവിലെ ഇന്ത്യൻ ടീം തയ്യാറാണെന്നും ശാസ്ത്രി കൂട്ടിച്ചേർത്തു.

ഒക്ടോബറിൽ ഓസ്ട്രേലിയയിൽ നടക്കാനിരിക്കുന്ന ടി20 ലോകകപ്പിനുള്ള ഒരുക്കത്തിലാണ് ടീം ഇന്ത്യ. ഇതിന് മുന്നോടിയായി ന്യൂസിലൻഡിനെതിരെയും ദക്ഷിണാഫ്രിക്കക്കെതിരെയും ഇന്ത്യക്ക് ടി20 പരമ്പരകളുണ്ട്. ഇത് ടീമിന്റെ ശക്തിദൗർബല്യങ്ങൾ മനസിലാക്കാനും തിരുത്തുവാനുമുള്ള അവസരമാണ് വിരാട് കോലിക്കും സംഘത്തിനും നൽകുന്നത്. ഇവ പരിഗണിച്ചുകൊണ്ട് ഇന്ത്യക്ക് ലോകകപ്പ് നേടികൊടുക്കുക തന്നെയാണ് തന്റെ ലക്ഷ്യമെന്ന് ശാസ്ത്രി പറയുന്നു.

വ്യക്തികൾക്ക് ടീമിൽ പ്രാധാന്യമില്ല. ഒത്തൊരുമിച്ച് ഒരു സംഘമായി നേരിടുകയാണ് പ്രധാനം. ഓസ്ട്രേലിയക്കെതിരായ വിജയം ടീമിന് വലിയ ആത്മവിശ്വാസമാണ് സമ്മാനിച്ചത്.കെ എൽ രാഹുൽ വിക്കറ്റ് കീപ്പറായും ശോഭിക്കുന്നത് ടീമിന് കൂടുതൽ സാധ്യതകൾ നൽകുന്നുവെന്നും ന്യൂസിലൻഡിനെതിരെ പരമ്പരക്ക് തൊട്ടുമുൻപായി ശാസ്ത്രി പറഞ്ഞു.

കിവീസിനെതിരെ അഞ്ച് ട്വന്റി20യിലും മൂന്ന് ഏകദിനത്തിലും രണ്ട് ടെസ്റ്റിലുമാണ് ഇന്ത്യ കളിക്കുക. ന്യൂസിലൻഡിനെതിരായ ടി20 പരമ്പരക്ക് നാളെ തുടക്കമാകും.ഓക്‌ലൻഡിൽ ഇന്ത്യൻ സമയം 12.20നാണ് മത്സരം.