ഐസിസി ടെസ്റ്റ് റാങ്കിംഗില്‍ ശ്രീലങ്കൻ ബാറ്റ്സ്മാൻ കുമാർ സംഗക്കാര ഒന്നാം സ്ഥാനത്തെത്തി. ആൾ റൗണ്ടർമാരുടെ റാങ്കിംഗിൽ ഇന്ത്യൻ താരം ആർ അശ്വിനാണ് ഒന്നാംസ്ഥാനത്ത്.

പാകിസ്ഥാനെതിരായ ഗാലെ ടെസ്റ്റിലെ ഇരട്ട സെഞ്ച്വറി നേടിയതാണ് ദക്ഷിണാഫ്രിക്കൻ താരം എബി സിവില്ലിയേഴ്സിനെ മറികടന്ന് ഒന്നാമതെത്താന്‍ സംഗക്കാരയെ തുണച്ചത്. 2012 നവംബറിലാണ് സംഗയ്ക്ക് ഒന്നാംസ്ഥാനം നഷ്ടമായത്.

ദക്ഷിണാഫ്രിക്കൻ താരം വെർനോൺ ഫിലാൻഡറിനെ മറികടന്നാണ് അശ്വിൻ ഒന്നാമതായത്. ഇംഗ്ളണ്ടിനെതിരായ നാലാം ടെസ്റ്റിലെ മികച്ച ബാറ്റിംഗാണ് അശ്വിനെ റാങ്കിംഗിൽ മുന്നിലെത്തിച്ചത്. ബൌളർമാരുടെ പട്ടികയില്‍ ജെയിംസ് ആൻഡേഴ്സണും സ്റ്റുവർട്ട് ബ്രോഡും മുന്നേറി. ആൻഡേഴ്സൺ അഞ്ചാം റാങ്കിലേക്കും ബ്രോഡ് ആറാം സ്ഥാനത്തേക്കും ഉയർന്നു.