കെറിപാക്കര്‍. മാന്യന്‍‌മാരുടെ കളിയുടെ വിപണന മൂല്യം കണ്ടെത്തിയത് ഈ ഓസ്‌ട്രേലിയന്‍ മാധ്യമ രാജാവാണ്. സമാധാനത്തിന്‍റെ വെള്ളയില്‍ നിന്ന് ഉത്തേജനം നല്‍കുന്ന കടും വര്‍ണ്ണങ്ങളിലേയ്‌ക്ക് അദ്ദേഹം ക്രിക്കറ്റിനെ പറിച്ചു നട്ടു.
കെറി പാക്കര്‍ സംഘടിപ്പിച്ച ലോക ക്രിക്കറ്റ് പരമ്പരയുടെ ഫലമായി ക്രിക്കറ്റ് താരങ്ങള്‍ക്ക് കനത്ത ശമ്പളം ലഭിക്കുവാന്‍ തുടങ്ങി. രാത്രിയില്‍ ഫ്ലൈഡ് ലൈറ്റിന് കീഴില്‍ വില്ലോയുടെ നാദം കേള്‍ക്കുവാന്‍ തുടങ്ങി. 50 ഓവര്‍ മത്സരത്തില്‍ നിന്ന് ക്രിക്കറ്റ് ഇന്ന് ട്വന്‍റി-20 മത്സരത്തില്‍ എത്തിയിരികുന്നു.
ഇതിനു പുറമെ ലോക ക്ലബ് ഫുട്ബോളില്‍ നിത്യ സാന്നിദ്ധ്യമായ ധന ലക്ഷ്‌മി ഇപ്പോള്‍ ക്രിക്കറ്റിന്‍റെ ലോകത്തിലേക്കും എത്തിയിരിക്കുന്നു. ക്രിക്കറ്റിന്‍റെ പണക്കൊഴുപ്പ് അങ്ങനെ പരിധികള്‍ വിട്ട് ഉയര്‍ന്നു.
1996 ല്‍ തന്നെ ഇന്ത്യന്‍ ക്രിക്കറ്റ് ബോര്‍ഡ് ഇതിനെക്കുറിച്ച് ആലോചിച്ചിരുന്നു. എന്നാല്‍, പിന്നീട് ആഭ്യന്തര ക്രിക്കറ്റിനെ പ്രതികൂലമായി ബാധിക്കുമെന്ന അഭിപ്രായങ്ങള്‍ ഉയര്‍ന്നതിനാല്‍ ഇത് വേണ്ടെന്നു വച്ചു.
