ഷാജൂണ്‍ കാര്യാല്‍ സംവിധാനം ചെയ്ത ‘രജപുത്രന്‍’ എന്ന ചിത്രത്തില്‍ സുരേഷ്ഗോപിയുടെ സഹാ‍യിയായി അഭിനയിച്ചത് ഇന്നത്തെ തമിഴ് സൂപ്പര്‍താരം വിക്രം ആണ്. ‘മാഫിയ’ എന്ന ചിത്രത്തില്‍ സുരേഷ്ഗോപിയുടെ അനുജന്‍ വേഷമായിരുന്നു വിക്രമിന്. ‘ധ്രുവം’ എന്ന സിനിമയിലും സുരേഷ്ഗോപിയും വിക്രമും ഒരുമിച്ച് അഭിനയിച്ചു.
ഇപ്പോള്‍ ഷങ്കറിന്‍റെ ‘ഐ’ എന്ന ചിത്രത്തില്‍ വിക്രമിന്‍റെ വില്ലനായി അഭിനയിക്കുന്നത് ആരെന്നോ? സാക്ഷാല്‍ സുരേഷ്ഗോപി. ഈ സിനിമയില്‍ താന്‍ വില്ലനാണെന്ന് സുരേഷ്ഗോപി തന്നെയാണ് വെളിപ്പെടുത്തിയിരിക്കുന്നത്.
രണ്ടുമൂന്നുവര്‍ഷങ്ങളായി അത്ര സജീവമായി സിനിമ ചെയ്യുന്നില്ല സുരേഷ്ഗോപി. ‘ഐ’ റിലീസാകുന്നതോടെ വമ്പന്‍ തിരിച്ചുവരവ് നടത്താമെന്നാണ് സുരേഷ്ഗോപി പ്രതീക്ഷിക്കുന്നത്.
വാല്‍ക്കഷണം: വര്‍ഷങ്ങള്‍ക്ക് മുമ്പ് ശങ്കര്‍ എന്ന നായകന്‍റെ വില്ലനായിരുന്നു മോഹന്ലാല്. പിന്നീട് മോഹന്‍ലാലിന്‍റെ വില്ലനായി ശങ്കര്‍ ‘കിഴക്കുണരും പക്ഷി’യില്‍ വന്നത് നമ്മള്‍ കണ്ടു. അഭിമന്യു ഉള്‍പ്പടെയുള്ള മോഹന്ലാല് സിനിമകളിലും ശങ്കറിന് വില്ലന്‍ പരിവേഷമായിരുന്നു. വിക്രമിന്‍റെ വില്ലനായി സുരേഷ്ഗോപി വരുന്നതും കൌതുകമുണര്‍ത്തുന്ന കാര്യം തന്നെ.
