അഗത|
Last Modified ചൊവ്വ, 22 ഡിസം‌ബര്‍ 2015 (15:50 IST)
ശിവ കാര്‍ത്തികേയന്‍ തന്‍റെ സിനിമകള്‍ തെരഞ്ഞെടുക്കുന്നതില്‍ അതീവ ശ്രദ്ധാലുവാണ്. താരമൂല്യം നിലനിര്‍ത്തുന്നതിനൊപ്പം മികച്ച പ്രകടനത്തിന് സാധ്യതയുള്ള സിനിമകള്‍ക്കാണ് ശിവ കാര്‍ത്തികേയന്‍ പ്രാധാന്യം നല്‍കുന്നത്. ശിവയുടെ അടുത്ത ചിത്രം സംവിധാനം ചെയ്യുന്നത് മോഹന്‍‌രാജയാണ്. അതേ, തമിഴകത്തിന് ‘തനി ഒരുവന്‍’ സമ്മാനിച്ച സംവിധായകന്‍ തന്നെ.
തനി ഒരുവന്‍ പോലെതന്നെ ഒരു അടിപൊളി ആക്ഷന്‍ എന്‍റര്‍ടെയ്നറായിരിക്കും ശിവ കാര്‍ത്തികേയനെ നായകനാക്കി മോഹന്‍‌രാജ ഒരുക്കുന്നത് എന്നതാണ് റിപ്പോര്‍ട്ടുകള്‍. ബിഗ് ബജറ്റില്‍ ഒരുങ്ങുന്ന ഈ സിനിമ 24എ‌എം സ്റ്റുഡിയോസാണ് നിര്‍മ്മിക്കുന്നത്.
രജനിമുരുകന്‍ ആണ് ഉടന്‍ റിലീസാകുന്ന ശിവ കാര്‍ത്തികേയന്‍ ചിത്രം. അതിന് ശേഷം ഭാഗ്യരാജ് ഭാരതി സംവിധാനം ചെയ്യുന്ന, പി സി ശ്രീറാം ക്യാമറ ചലിപ്പിക്കുന്ന സിനിമ. ഇപ്പോഴിതാ മോഹ‌രാജയും ശിവ കാര്‍ത്തികേയനുമായി കൈകോര്‍ക്കുന്നു. ഒന്നാം നിര നായകന്‍‌മാരുടെ ഇടയിലേക്ക് ശിവയും പതിയെ നടന്നുകയറുകയാണ്.
