Last Modified ശനി, 16 ഏപ്രില്‍ 2016 (13:03 IST)
‘തെറി’ തരംഗം കേരളത്തിലും. ഇളയദളപതി വിജയ് തകര്‍ത്തഭിനയിക്കുന്ന അറ്റ്‌ലീ ചിത്രം തെറി കേരളത്തിലെ തിയേറ്ററുകളിലും കോടികള്‍ വാരി മുന്നേറുകയാണ്. ആദ്യ ദിനത്തില്‍ 2.4 കോടി രൂപയാണ് തെറിയുടെ കളക്ഷന്‍.
മോഹന്‍ലാലിന്‍റെ ‘ലോഹം’ ആദ്യ ദിനത്തില്‍ 2.19 കോടിയാണ് കളക്ഷന്‍ നേടിയത്. ദുല്‍ക്കര്‍ സല്‍മാന്‍റെ ‘കലി’യുടെ റിലീസ് ദിവസത്തെ കളക്ഷന്‍ 2.33 കോടിയായിരുന്നു. ഇപ്പോള്‍ തെറി അവയെ എല്ലാം മറികടന്നിരിക്കുകയാണ്.
മൂന്ന് ഘട്ടങ്ങളിലൂടെയുള്ള വിജയുടെ കഥാപാത്രങ്ങളുടെ അസാധാരണ സഞ്ചാരങ്ങള്‍, ബേബി നൈനികയുടെ ഗംഭീര പ്രകടനം, മഹേന്ദ്രന്‍റെ തകര്‍പ്പന്‍ വില്ലന്‍ ഇതെല്ലാം തെറിയുടെ മഹാവിജയത്തില്‍ പ്രധാന ഘടകങ്ങളായി. കാര്‍ണിവല്‍ മോഷന്‍ പിക്ചേഴ്സുമായി ചേര്‍ന്ന് ഫ്രൈഡേ ഫിലിം ഹൌസാണ് തെറി കേരളത്തില്‍ വിതരണം ചെയ്തിരിക്കുന്നത്. ചിത്രം ബ്ലോക് ബസ്റ്ററെന്ന് ആദ്യദിന കളക്ഷന്‍ തെളിയിച്ചിരിക്കുകയാണ്.
വിഷുവിന് റിലീസ് പ്രതീക്ഷിച്ചിരുന്ന ചില മലയാള ചിത്രങ്ങള്‍ തെറിയുടെ വരവോടെ റിലീസ് മാറ്റിവച്ചു എന്നതുതന്നെ ഇളയദളപതിക്ക് കേരളത്തില്‍ എത്രമാത്രം സ്വാധീനം ചെലുത്താനായി എന്നതിന്‍റെ തെളിവാണ്.
