ഫഹദ് അവിവാഹിതന്‍, ഒരു പെണ്‍കുട്ടി കടന്നുവന്നാ‍ല്‍....?
WEBDUNIA|
PRO
സത്യന് അന്തിക്കാട് സംവിധാനം ചെയ്യുന്ന പുതിയ ചിത്രത്തില്‍ ഫഹദ് ഫാസിലാണ് നാ‍യകന്‍. പട്ടണത്തിന്‍റെ പശ്ചാത്തലത്തിലാണ് ഈ സിനിമയുടെ കഥ ഒരുങ്ങുന്നത്. അവിവാഹിതനായ ഒരു ചെറുപ്പക്കാരന്‍റെ കഥയാണ് സത്യന് ഇത്തവണ പറയുന്നത്. അയാളുടെ ജീവിതത്തിലേക്ക് ഒരു പെണ്‍കുട്ടി കടന്നുവരുമ്പോഴുണ്ടാകുന്ന പ്രശ്നങ്ങളാണ് പ്രമേയം.
ന്യൂജനറേഷന്‍ സിനിമയുടെ മുഖമായ ഫഹദ് ഫാസില് കരിയറില്‍ വലിയ മാറ്റത്തിന് തയ്യാറാകുന്നതിന്‍റെ ഭാഗമായാണ് സത്യന് അന്തിക്കാടിന്‍റെ ചിത്രത്തില്‍ അഭിനയിക്കുന്നത്. ‘പുതിയ തീരങ്ങള്‍’ എന്ന സിനിമയുടെ കനത്ത പരാജയത്തിന് ശേഷം സത്യന് സംവിധാനം ചെയ്യുന്ന ചിത്രമാണിത്. ഇക്ബാല്‍ കുറ്റിപ്പുറമാണ് ഈ സിനിമയ്ക്ക് തിരക്കഥ രചിക്കുന്നത്.
മേയ് അവസാനം പുതിയ സിനിമയുടെ ചിത്രീകരണം ആരംഭിക്കാനാണ് തീരുമാനം. സ്വന്തമായി തിരക്കഥയെഴുതിയ ചില സിനിമകള്‍ പരാജയപ്പെട്ടപ്പോഴാണ് സത്യന് അന്തിക്കാട് കഴിഞ്ഞ ചിത്രത്തില്‍ ബെന്നി പി നായരമ്പലത്തിന്‍റെ രചന സ്വീകരിച്ചത്. എന്നാല്‍ അതും വിജയമായില്ല. എന്തായാലും ഫഹദ് ഫാസിലിന്‍റെ സൂപ്പര്‍ഹിറ്റ് ചിത്രമായ ഡയമണ്ട് നെക്ലേസിന്‍റെ തിരക്കഥാകൃത്തായ ഇക്ബാല്‍ കുറ്റിപ്പുറത്തെ കൂട്ടുപിടിച്ച് ഒരു ഹിറ്റ് സൃഷ്ടിക്കാനാണ് സത്യന് അന്തിക്കാടിന്‍റെ ശ്രമം.
ന്യൂജനറേഷന്‍ സംവിധായകരോടൊപ്പം സഞ്ചരിച്ചിരുന്ന ഫഹദ് ഫാസില് സാവധാനം സീനിയര്‍ സംവിധായകരിലേക്കെത്തുകയാണ്. ജോഷിയും പ്രിയദര്‍ശനും രഞ്ജിത്തുമൊക്കെ ഫഹദിനെ നായകനാക്കുന്ന കാലം വിദൂരമല്ലെന്ന് പ്രതീക്ഷിക്കാം.
