രേണുക വേണു|
Last Modified ശനി, 30 ഒക്‌ടോബര്‍ 2021 (08:43 IST)
ആഡംബര കപ്പലിലെ ലഹരി പാര്‍ട്ടി കേസില്‍ പ്രതിയായ മകന്‍ ജയില്‍വാസത്തിനു ശേഷം മടങ്ങിയെത്തുന്നതിന്റെ സന്തോഷത്തിലാണ് ബോളിവുഡ് സൂപ്പര്‍താരം ഷാരൂഖ് ഖാന്. കേസില്‍ ആര്യന് ഖാന് നേരത്തെ ജാമ്യം കിട്ടിയിരുന്നു. വെള്ളിയാഴ്ച തന്നെ ആര്യന് ജയില്‍ മോചിതനാകുമെന്നാണ് ഷാരൂഖ് കരുതിയിരുന്നത്. എന്നാല്‍, ജാമ്യ നടപടികള്‍ പൂര്‍ത്തിയാകാത്തതിനാല്‍ ആര്യന് വെള്ളിയാഴ്ച പുറത്തിറങ്ങാന്‍ സാധിച്ചില്ല. ആര്യനെ സ്വീകരിക്കാന്‍ 'മന്നത്ത്' എന്ന് പേരുള്ള തന്റെ മുംബൈയിലെ വീട് ഷാരൂഖ് ഖാനും ഗൗരി ഖാനും അലങ്കരിച്ചു. വീട്ടില്‍ പ്രത്യേക ലൈറ്റുകളിട്ടു. ഇതിന്റെ ചിത്രങ്ങള്‍ സോഷ്യല്‍ മീഡിയയില്‍ വൈറലായിട്ടുണ്ട്. വീടിനു മുകളില്‍ ഷാരൂഖും ഗൗരിയും ചേര്‍ന്ന് വിളക്കുകള്‍ കത്തിച്ചുവച്ചു. ഷാരൂഖിന്റെ വീടിനു മുന്നില്‍ രാത്രി ഏറെ വൈകിയും ആരാധകരും മാധ്യമപ്രവര്‍ത്തകരും കാത്തുനിന്നു. മുംബൈ ആര്‍തര്‍ റോഡ് ജയിലിലാണ് ആര്യന് ഇപ്പോള്‍ ഉള്ളത്.
