മലയാളത്തിൽ അരങ്ങേറിയ ആദ്യ ചിത്രത്തിൽ തന്നെ മികച്ച നായികക്കുള്ള സംസ്ഥാന അവാർഡ് ഏറ്റുവാങ്ങിയ നടിയാണ് രജിഷ വിജയൻ. ഫൈനൽസ് എന്ന ചിത്രത്തിലെ മികച്ച പ്രകടനത്തിന് ശേഷം വിധു വിൻസെന്റ് സംവിധാനം ചെയ്ത സ്റ്റാൻഡപ്പ് വരെയുള്ള ചിത്രങ്ങൾക്ക് മികച്ച പ്രതികരണങ്ങളാണ് പ്രേക്ഷകരിൽ നിന്നും രജിഷക്ക് ലഭിച്ചിട്ടുള്ളത്. എന്നാൽ ഇപ്പോളിതാ രജിഷ തമിഴിൽ അരങ്ങേറ്റം കുറിക്കുന്നതായുള്ള വാർത്തകളാണ് പുറത്തുവരുന്നത്.

പരിയേറും പെരുമാൾ എന്ന ചിത്രത്തിന് ശേഷം മാരി സെൽവരാജ് സംവിധാനം ചെയ്യുന്ന ധനുഷ് ചിത്രത്തിൽ രജിഷ നായികയാകുമെന്ന വാർത്തയാണ് ഇപ്പോൾ പുറത്തുവരുന്നത്. അസുരൻ,കബാലി,തെരി തുടങ്ങിയ സൂപ്പർഹിറ്റ് ചിത്രങ്ങൾ നിർമിച്ച കലൈപ്പുള്ളി എസ് തനുവാണ് ചിത്രം നിർമിക്കുന്നത്. രജിഷക്ക് പുറമെ മലയാളത്തിൽ നിന്നും നടൻ ലാൽ,നാട്ടി നടരാജ് എന്നിവരും ചിത്രത്തിൽ അഭിനയിക്കുന്നുണ്ട്.