തുടര്‍ച്ചയായി ഹിറ്റ് സിനിമകളുമായി ഇന്ത്യന്‍ സിനിമയെ വിസ്മയിപ്പിക്കുന്ന തിരക്കിലാണ് മോളിവുഡ്. ഒരു സിനിമയ്ക്ക് ശേഷം അടുത്തത് എന്ന നിലയിലാണ് മലയാളത്തില്‍ ഇപ്പോള്‍ ഹിറ്റുകള്‍ സംഭവിക്കുന്നത്. വിഷു റിലീസായി എത്തിയ 3 സിനിമകള്‍ക്കും മികച്ച പ്രതികരണമാണ് ലഭിക്കുന്നത്. ഇതില്‍ വര്‍ഷങ്ങള്‍ക്ക് ശേഷമെന്ന വിനീത് ശ്രീനിവാസന്‍ സിനിമ ഏറെ പ്രതീക്ഷയോടെയാണ് ആരാധകര്‍ കണ്ടിരുന്നത്. വിഷു വിന്നര്‍ പട്ടം ആവേശം സ്വന്തമാക്കിയെങ്കിലും മികച്ച പ്രതികരണമാണ് വര്‍ഷങ്ങള്‍ക്ക് ശേഷം നേടുന്നത്.

സിനിമയുടെ സെക്കന്‍ഡ് ഹാഫിലെ നിവിന്‍ പോളിയുടെ പ്രതികരണമാണ് പ്രേക്ഷകരെ സിനിമയെ ഏറ്റെടുക്കാന്‍ സഹായിച്ചത്. മുഴുനീള വേഷമല്ലെങ്കിലും സിനിമ നിവിന്‍ പോളി കൊണ്ടുപോയെന്നാണ് ആരാധകര്‍ പറയുന്നത്. സിനിമയിലെ പല താരങ്ങളെയും ട്രോള്‍ ചെയ്യുന്ന രൂപത്തിലാണ് സിനിമയിലെ നിവിന്‍ പോളിയുടെ കഥാപാത്രം. ഈ ട്രോളുകള്‍ക്ക് മികച്ച കയ്യടിയാണ് തിയേറ്ററില്‍ നിന്നും ലഭിക്കുന്നത്. ഇത്തരം ട്രോളുകള്‍ എല്ലാവരും ആസ്വദിക്കുമെന്നാണ് സംവിധായകന്‍ വിനീത് ശ്രീനിവാസന്‍ പറയുന്നത്.

പ്രേമലു എന്ന സിനിമയില്‍ ഹൃദയം സിനിമയ്ക്കിട്ട് നല്ല താങ്ങ് താങ്ങുന്നുണ്ട്. അതുപോലെ തന്നെ ആ സിനിമയുടെ നിര്‍മാതാക്കളായ ദിലീഷ് പോത്തന്‍,ശ്യാം പുഷ്‌കരന്‍ തുടങ്ങിയവരെ വര്‍ഷങ്ങള്‍ക്ക് ശേഷത്തിലും ട്രോളുന്നുണ്ട്. എല്ലാവരും സുഹൃത്തുക്കളാകുമ്പോള്‍ അതിലൊരു പ്രശ്‌നമില്ല. പ്രേമലുവിന്റെ സംവിധായകന്റെ ആദ്യ സിനിമയായ തണ്ണീര്‍മത്തന്‍ ദിനങ്ങളില്‍ ഞാനുണ്ടായിരുന്നു. നിവിനും ഫഹദുമെല്ലാം സുഹൃത്തുക്കളാണ്. പുറത്ത് നിന്നുള്ളവരെ ട്രോളുമ്പോഴാണ് വിവാദമുണ്ടാകുന്നത്. വിനീത് പറഞ്ഞു.