കെ ആര്‍ അനൂപ്|
Last Modified ബുധന്‍, 20 മാര്‍ച്ച് 2024 (14:33 IST)
മോഹന്‍ലാലിന്റെ പുതിയ സിനിമയെ കുറിച്ചാണ് എങ്ങും ചര്‍ച്ച.L360 എന്ന പേരില്‍ അറിയപ്പെടുന്ന ചിത്രം തരുണ്‍ മൂര്‍ത്തിയാണ് സംവിധാനം ചെയ്യുന്നത്. ഒരുപാട് മികച്ച നിമിഷങ്ങള്‍ വരാനിരിക്കുന്ന സിനിമയില്‍ ഉണ്ടാകുമെന്ന് സംവിധായകന്‍ തന്നെ വെളിപ്പെടുത്തി. നടന്‍ യുഎസിലേക്ക് പോകുന്നതിന് മുമ്പാണ് കഥയുടെ ആദ്യ പകുതി കേട്ടത്. തിരിച്ചെത്തിയ ശേഷം രണ്ടാം പകുതിയും കേട്ടു. സിനിമയുടെ കഥ പറയുമ്പോള്‍ ഓരോ രംഗത്തെക്കുറിച്ചും വലിയ കൗതുകമായിരുന്നു മോഹന്‍ലാലിന് എന്ന് തരുണ്‍ മൂര്‍ത്തി പറയുന്നു.
കഥ കേട്ടപ്പോള്‍ ആവേശഭരിതനായെന്നാണ് മോഹന്‍ലാല്‍ പറഞ്ഞതെന്നും എല്‍ 360 വൈകാതെ തന്നെ തുടങ്ങാന്‍ അദ്ദേഹം നിര്‍ദ്ദേശിച്ചിരുന്നു, അതിനാലാണ് ഏപ്രിലില്‍ ചിത്രീകരണം നടത്താന്‍ തീരുമാനിച്ചതെന്നും തരുണ്‍ മൂര്‍ത്തി പറഞ്ഞു.
രജപുത്ര നിര്‍മ്മിക്കുന്ന ചിത്രത്തില്‍ പത്തനംതിട്ട ജില്ലയിലെ റാന്നിയിലെ ഒരു സാധാരണക്കാരനായ ടാക്‌സി ഡ്രൈവറായി മോഹന്‍ലാല്‍ വേഷമിടും. ലാല്‍ ഒരു റിയലിസ്റ്റിക് നായിക കഥാപാത്രത്തെ ആകും സിനിമയില്‍ അവതരിപ്പിക്കുക. സാധാരണ മനുഷ്യരുടെയും അവരുടെ ജീവിതത്തെയും തൊടുന്ന തരത്തിലുള്ള കഥയാണ് ചിത്രം പറയാനിരിക്കുന്നത്.തരുണ്‍ മൂര്‍ത്തിയും സുനിലും ചേര്‍ന്നാണ് തിരക്കഥ ഒരുക്കിയിരിക്കുന്നത്.ഛായാഗ്രാഹണം നിര്‍വഹിക്കുന്നത് ഷാജികുമാര്‍.
