രേണുക വേണു|
Last Modified തിങ്കള്‍, 2 സെപ്‌റ്റംബര്‍ 2024 (09:41 IST)
മമ്മൂട്ടിയുടെ അറയ്ക്കല്‍ മാധവനുണ്ണിയെ വീണ്ടും തിയറ്ററുകളില്‍ കാണാമെന്ന ആവേശത്തില്‍ ആരാധകര്‍. രഞ്ജിത്തിന്റെ തിരക്കഥയില്‍ ഷാജി കൈലാസ് സംവിധാനം ചെയ്ത മമ്മൂട്ടി ചിത്രം 'വല്ല്യേട്ടന്‍' റി റിലീസിനു ഒരുങ്ങുകയാണ്. 2000-ത്തില്‍ തിയറ്ററുകളിലെത്തിയ 'വല്ല്യേട്ടന്‍' ബോക്‌സ്ഓഫീസില്‍ വന്‍ വിജയമായിരുന്നു. ചിത്രത്തിലെ മമ്മൂട്ടി കഥാപാത്രത്തിനു ഇപ്പോഴും വലിയ ആരാധകരുണ്ട്.
4K ഡോള്‍ബി അറ്റ്‌മോസ് സാങ്കേതിക വിദ്യയുടെ സഹായത്തോടെയാണ് വല്ല്യേട്ടന്റെ റി റിലീസ്. മാറ്റിനി നൗ ആണ് ചിത്രം തിയറ്ററുകളിലെത്തിക്കുക. ഈ മാസം അവസാനത്തോടെ റി റിലീസ് ഉണ്ടാകും. അമ്പലക്കര ഫിലിംസിന്റെ ബാനറില്‍ അനില്‍ അമ്പലക്കരയും ബൈജു അമ്പലക്കരയും ചേര്‍ന്നാണ് ചിത്രം നിര്‍മിച്ചത്.
അനിയന്‍മാര്‍ക്കു വേണ്ടി ചങ്കുപറിച്ചു കൊടുക്കുന്ന വല്ല്യേട്ടനായാണ് മമ്മൂട്ടി സിനിമയില്‍ അഭിനയിച്ചിരിക്കുന്നത്. സിദ്ദിഖ്, മനോജ് കെ ജയന്‍, സുധീഷ്, വിജയകുമാര്‍, സായ് കുമാര്‍, ഇന്നസെന്റ്, ക്യാപ്റ്റന്‍ രാജു, കലാഭവന്‍ മണി, ശോഭന, പൂര്‍ണിമ ഇന്ദ്രജിത്ത്, സുകുമാരി എന്നിവരാണ് സിനിമയില്‍ പ്രധാന വേഷങ്ങള്‍ അവതരിപ്പിച്ചിരിക്കുന്നത്. ഗിരീഷ് പുത്തഞ്ചേരിയുടെ വരികള്‍ക്കു രാജാമണിയാണ് സംഗീതം പകര്‍ന്നിരിക്കുന്നത്. രവിവര്‍മ്മന്‍ ആണ് ഛായാഗ്രഹണം.
