ഷങ്കര്‍- കമല്‍ ഹാസന്‍ കോമ്പോ വെറുതെ പ്രേക്ഷകരുടെ മുന്നിലേക്ക് വരില്ല. പ്രതീക്ഷകള്‍ അവര്‍ തെറ്റിച്ചില്ല, ഗംഭീര പ്രതികരണമാണ് ഇന്ത്യന്‍ 2 ട്രെയ്‌ലറിന് ലഭിക്കുന്നത്. മണിക്കൂറുകള്‍ കൊണ്ട് തന്നെ യൂട്യൂബ് ട്രെന്‍ഡിങ്ങില്‍ മുന്നിലെത്തി ട്രെയിലര്‍. 13 മണിക്കൂര്‍ കൊണ്ട് 46 ലക്ഷത്തിലേക്ക് അടുക്കുകയാണ് കാഴ്ചക്കാരുടെ എണ്ണം. 2.4 ലക്ഷം ലൈക്കുകളും ട്രെയ്‌ലറിന് ലഭിച്ചു എന്നത് നേട്ടമാണ്.

സേനാപതി എന്ന മുന്‍ സ്വാതന്ത്രസമര സേനാനിയായി കമല്‍ ഹാസന്‍ തിരിച്ചെത്തുമ്പോള്‍ പുതിയകാലത്തെ അഴിമതി കഥകളാണ് ചിത്രം പറയാനിരിക്കുന്നത്. വേറിട്ട ഗെറ്റപ്പുകളില്‍ കമല്‍ഹാസന്‍ പ്രത്യക്ഷപ്പെടുന്നുണ്ട്. അണികളെ നയിക്കുമ്പോള്‍ ഒരു രൂപത്തിലും ആക്ഷന്‍ രംഗങ്ങളിലേക്ക് എത്തുമ്പോള്‍ പല രൂപങ്ങളിലുമാണ് നടന്‍ പ്രത്യക്ഷപ്പെടുന്നത്.ഷങ്കറിന്റെ ബിഗ് കാന്‍വാസ് കാഴ്ചക്കാര്‍ക്ക് പുതിയ അനുഭവം സമ്മാനിക്കുന്നു.

2.37 മിനിറ്റ് ദൈര്‍ഘ്യമുള്ള ട്രെയ്‌ലര്‍ യൂട്യൂബില്‍ തരംഗമാകുകയാണ്.നെടുമുടി വേണുവിനെ ഒരിക്കല്‍ക്കൂടി കാണാനായത് ആരാധകര്‍ക്ക് സന്തോഷം നല്‍കുന്നു. തമിഴില്‍ നെടുമുടി വേണുവിന് പകരം മറ്റൊരാളാണ് ശബ്ദം നല്‍കിയിരിക്കുന്നത്. പ്രാധാന്യമുള്ള കഥാപാത്രത്തെയാണ് അദ്ദേഹം അവതരിപ്പിക്കുന്നത്. ടൈലറില്‍ പോലും നിരവധി തവണ അദ്ദേഹം വന്നു പോയി.

കമല്‍ ഹാസനൊപ്പം കാജല്‍ അഗര്‍വാള്‍, സിദ്ധാര്‍ഥ്, ബോബി സിംഹ, രാകുല്‍ പ്രീത് സിംഗ്, എസ് ജെ സൂര്യ, പ്രിയ ഭവാനി ശങ്കര്‍, സമുദ്രക്കനി, ബ്രഹ്‌മാനന്ദം, നെടുമുടി വേണു, കാളിദാസ് ജയറാം എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. ഇന്ത്യന്‍ 2 നിര്‍മ്മിക്കുന്നത് സുഭാസ്‌കരന്‍ അല്ലിരാജയുടെ ലൈക്ക പ്രൊഡക്ഷന്‍സും കമല്‍ ഹാസന്റെ രാജ്കമല്‍ ഫിലിംസും ഉദയനിധി സ്റ്റാലിന്റെ റെഡ് ജയന്റ് മൂവീസും ചേര്‍ന്നാണ്.