വിക്രം എന്ന വമ്പന്‍ ഹിറ്റിന് ശേഷം നിരവധി സിനിമകളില്‍ ഭാഗമായെങ്കിലും മറ്റൊരു കമല്‍ഹാസന്‍ സിനിമയും ഇതുവരെയും പുറത്തുവന്നിട്ടില്ല. വിക്രത്തിന്റെ വമ്പന്‍ വിജയത്തിന് ശേഷം ഇന്ത്യന്‍ സിനിമയുടെ രണ്ടാം ഭാഗത്തിലും മണിരത്‌നം സിനിമയിലുമെല്ലാം കമല്‍ ഹാസന്‍ ഭാഗമാണ്. എന്നാല്‍ ഈ സിനിമകള്‍ എന്ന് പുറത്തുവരുമെന്നും ഇവയുടെ ഷൂട്ട് എത്രമാത്രം പൂര്‍ത്തിയായെന്നുമുള്ള വിവരങ്ങള്‍ ഇതുവരെ പുറത്തുവന്നിരുന്നില്ല. ഇപ്പോഴിതാ ഇന്ത്യന്‍ 2 മാത്രമല്ല ഇന്ത്യന്‍ സിനിമയുടെ മൂന്നാം ഭാഗത്തിന്റെയും ചിത്രീകരണം പൂര്‍ത്തിയായതായി അറിയിച്ചിരിക്കുകയാണ് കമല്‍ഹാസന്‍.

ദി ഹിന്ദുവിന് നല്‍കിയ അഭിമുഖത്തിലാണ് കമല്‍ഹാസന്റെ വെളിപ്പെടുത്തല്‍. സിനിമകള്‍ അടുത്തടുത്ത് റിലീസ് ചെയ്യുന്നതിലല്ല അവയുടെ ഗുണനിലവാരത്തിലാണ് കാര്യം. ഇന്ത്യന്‍ 2, ഇന്ത്യന്‍ 3 സിനിമകളാണ് ഇതിനകം ചിത്രീകരണം പൂര്‍ത്തിയാക്കിയത്. ഇന്ത്യന്‍ 2വിന്റെ പോസ്റ്റ് പ്രൊഡക്ഷന്‍ പുരോഗമിക്കുകയാണ്. അതിന് ശേഷമാകും ഇന്ത്യന്‍ 3യുടെ പോസ്റ്റ് പ്രൊഡക്ഷനിലേക്ക് കടക്കുക. കല്‍കി എന്ന സിനിമയില്‍ അതിഥി വേഷത്തില്‍ അഭിനയിക്കുന്നുണ്ട്. തഗ് ലൈഫിന്റെ ചിത്രീകരണം ഉടന്‍ ആരംഭിക്കും. അഭിമുഖത്തില്‍ കമല്‍ഹാസന്‍ പറഞ്ഞു.

1996ല്‍ ഇന്ത്യയെങ്ങും വമ്പന്‍ വിജയമായ ഇന്ത്യന്‍ സിനിമയുടെ രണ്ടാം ഭാഗം നിര്‍മിക്കുന്നത് ലൈക്ക പ്രൊഡക്ഷനും കമല്‍ഹാസന്റെ രാജ് കമല്‍ ഫിലിംസും ഉദയനിധി സ്റ്റാലിന്റെ റെഡ് ജയന്‍്‌സും ചേര്‍ന്നാണ്. കമല്‍ ഹാസന്‍ ഊര്‍മിള മണ്ഡോദ്കര്‍, മനീഷ കൊയ്‌രാള,സുകന്യ,നടുമുടി വേണു എന്നിവരായിരുന്നു ഇന്ത്യന്‍ സിനിമയുടെ ആദ്യഭാഗത്ത് അഭിനയിച്ചത്. സിനിമയിലെ അഭിനയത്തിന് ദേശീയ പുരസ്‌കാരവും കമല്‍ഹാസന്‍ സ്വന്തമാക്കിയിരുന്നു.