ഭര്‍ത്താവുമായി വേര്‍പിരിഞ്ഞതായി സ്ഥിരീകരിച്ച് നടി ഭാമ. സമൂഹമാധ്യമങ്ങളില്‍ പങ്കുവെച്ച പോസ്റ്റിലാണ് താന്‍ സിംഗിള്‍ മദറാണെന്ന് ഭാമ വ്യക്തമാക്കിയത്. 2020ലായിരുന്നു ഭാമയും അരുണും തമ്മില്‍ വിവാഹിതരാകുന്നത്. വിവാഹത്തെ തുടര്‍ന്ന് ഭാമ സിനിമാ രംഗത്ത് നിന്നും വിട്ടുനില്‍ക്കുകയായിരുന്നു. ആദ്യകാലങ്ങളില്‍ ഭാമ ഭര്‍ത്താവുമൊത്തുള്ള ചിത്രങ്ങള്‍ സമൂഹമാധ്യമങ്ങളില്‍ പങ്കുവെച്ചിരുന്നു. എന്നാല്‍ അടുത്തിടെ ചിത്രങ്ങളൊന്നും തന്നെ പങ്കുവെച്ചിട്ടില്ല. ഭര്‍ത്താവിന്റെ ചിത്രങ്ങള്‍ ഒഴിവാക്കിയതിന് പിന്നാലെ ഭാമ അരുണ്‍ എന്ന പേരില്‍ മാറ്റം വരുത്തിയതോടെയാണ് ഇരുവരും വേര്‍പിരിഞ്ഞതായ വാര്‍ത്തകള്‍ വന്നത്.

വേര്‍പിരിഞ്ഞതായുള്ള വാര്‍ത്തകള്‍ വന്നിരുന്നെങ്കിലും ഇതിനോടൊന്നും തന്നെ നടി പ്രതികരിച്ചിരുന്നില്ല. ഇന്‍സ്റ്റഗ്രാം പോസ്റ്റിലാണ് ഒടുവില്‍ നടി സ്ഥിരീകരണം നല്‍കിയത്. ഒരു സിംഗിള്‍ മദറാകുന്നത് വരെ ഞാന്‍ ഇത്രത്തോളം ശക്തയാണെന്ന് എനിക്ക് അറിയില്ലായിരുന്നു. കൂടുതല്‍ ശക്തയാകുക എന്നത് മാത്രമാണ് എനിക്ക് മുന്നിലുണ്ടായിരുന്നു ഒരേ ഒരു മാര്‍ഗം. ഞാനും എന്റെ മകളും എന്നാണ് മകള്‍ക്കൊപ്പമുള്ള ചിത്രം പങ്കുവെച്ചുകൊണ്ട് നടി കുറിച്ചത്. 2007ല്‍ നിവേദ്യം എന്ന സിനിമയിലൂടെയാണ് താരം അഭിനയരംഗത്തെത്തിയത്. 2017ല്‍ ഇറങ്ങിയ കന്നഡ സിനിമയായ രംഗയിലാണ് താരം അവസാനമായി അഭിനയിച്ചത്.