മലയാളത്തില്‍ പൊലീസ് വേഷത്തില്‍ മിന്നിത്തിളങ്ങുന്ന താരങ്ങള്‍ ആരൊക്കെ? അത് മമ്മൂട്ടിയെന്നും സുരേഷ്ഗോപിയെന്നുമുള്ള രണ്ടുപേരില്‍ ഒതുങ്ങിയിരുന്നു കുറച്ചുകാലം മുമ്പുവരെ. ഇപ്പോള്‍ പൃഥ്വിരാജും ആ അംഗീകാരം നേടിയ നടനാണ്.

മമ്മൂട്ടിയും സുരേഷ്ഗോപിയുമൊക്കെ പൊലീസ് വേഷത്തിലെത്തുമ്പോള്‍ പ്രേക്ഷകര്‍ ത്രില്ലടിച്ചിരുന്നാണ് അവരുടെ പ്രകടനം വീക്ഷിക്കാറുള്ളത്. അവര്‍ യഥാര്‍ത്ഥ പൊലീസ് ഉദ്യോഗസ്ഥര്‍ തന്നെയാണെന്ന തോന്നല്‍ അപ്പോള്‍ പ്രേക്ഷകരില്‍ ഉണരുന്നു.

മമ്മൂട്ടിക്കും മോഹന്‍ലാലിനൊമൊപ്പം അഭിനയത്തില്‍ മത്സരിക്കാന്‍ പോന്ന വൈഭവമുള്ള നടിയാണ് മഞ്ജു വാര്യര്‍. ഇനി പൊലീസ് വേഷത്തില്‍ ഒരുകൈ നോക്കാനാണ് മഞ്ജു ഒരുങ്ങുന്നത്. രാജേഷ് പിള്ള സംവിധാനം ചെയ്യുന്ന ‘വേട്ട’യില്‍ കമ്മീഷണര്‍ ശ്രീബാല ഐ പി എസ് എന്ന കഥാപാത്രത്തെയാണ് മഞ്ജു അവതരിപ്പിക്കുന്നത്. മഞ്ജുവിന്‍റെ ആദ്യ പൊലീസ് വേഷം.

“സിനിമയില്‍ തൊണ്ണൂറു ശതമാനം വരുന്ന പൊലീസ് വേഷങ്ങളും പുരുഷന്‍‌മാര്‍ അവതരിപ്പിച്ച് കൈയടി നേടിയതാണ്. മലയാ‍ളത്തില്‍ മമ്മുക്കയും സുരേഷേട്ടനും ഈ വേഷം തങ്ങളുടേതുതന്നെയെന്ന വിധത്തിലാണ് പെര്‍ഫോം ചെയ്യുന്നത്. ആ സാഹചര്യത്തില്‍ ഒരു സ്ത്രീ കഥാപാത്രത്തിന് ഷൈന്‍ ചെയ്യാനാകുമോ എന്ന ചിന്തയുണ്ടായിരുന്നു. എന്നാല്‍ സംവിധായകന്‍ കഥാപാത്രത്തേക്കുറിച്ച് വിശദമായി പറഞ്ഞതോടെ നല്ല ധൈര്യമായി” - ഒരു സിനിമാ പ്രസിദ്ധീകരണത്തിന് അനുവദിച്ച അഭിമുഖത്തില്‍ മഞ്ജു വാര്യര്‍ പറയുന്നു.

ഒരു സെലിബ്രിറ്റിയുടെ മരണവും അതിന്‍റെ അന്വേഷണവുമാണ് വേട്ടയുടെ പ്രമേയം. കുഞ്ചാക്കോ ബോബനും ഇന്ദ്രജിത്തുമാണ് ചിത്രത്തിലെ നായകന്‍‌മാര്‍. അരുണ്‍‌ലാല്‍ രാമചന്ദ്രന്‍റെ തിരക്കഥയിലാണ് ചിത്രം ഒരുങ്ങുന്നത്.