നോക്കിയയുടെ പുതിയ ആന്‍ഡ്രോയ്ഡ് ഫോണുകളുടെ വില വിവരങ്ങള്‍ പുറത്തുവന്നു. ഫോണിന്റെ ഫീച്ചറുകള്‍, ഡിസൈന്‍, മോഡലുകള്‍, പുറത്തിറങ്ങുന്ന തീയതി തുടങ്ങിയ കാര്യങ്ങളെകുറിച്ചുള്ള വിവരങ്ങളെല്ലാം തന്നെ നിരവധി ടെക്ക് വെബ്‌സൈറ്റുകളില്‍ വന്നിരുന്നു. ഏറ്റവും അവസാനമായാണ് ഇപ്പോള്‍ വില വിവരങ്ങള്‍ പുറത്തുവന്നിരിക്കുന്നത്.

നോക്കിയ ഡി വണ്‍ സി എന്ന മോഡലിനു 10,000 രൂപ മുതലാണ് വിലതുടങ്ങുന്നതെന്നാണ് nokiapoweruser.com എന്ന വെബ്‌സൈറ്റ് റിപ്പോര്‍ട്ട് ചെയ്യുന്നത്. രണ്ട് ജി ബി റാം ഉള്ള മോഡലിനു 9,999 രൂപയും, 3 ജിബി റാമോട് കൂടിയ മോഡലിനു 12,999 രൂപയുമാണ് വില. അതേസമയം ഫോണിനെ കുറിച്ചുള്ള കൂടുതല്‍ വിവരങ്ങളൊന്നും നോക്കിയ ഇതുവരെയും പുറത്തുവിട്ടിട്ടില്ല.

2017 ലായിരിക്കും നോക്കിയ ഫോണുകള്‍ വിപണിയിലെത്തുകയെന്നാണ് വിവരങ്ങള്‍. നോക്കിയ D1C എന്ന പേരിലുള്ള ഗോള്‍ഡ്, ബ്ലാക്ക്, വൈറ്റ് എന്നീ നിറങ്ങളിലുള്ള ഹാന്‍ഡ്‌സെറ്റിന്റെ ചിത്രങ്ങളായിരുന്നു നേരത്തെ പുറത്തുവന്നിരുന്നത്. ഹൈ എന്‍ഡ് വേര്‍ഷനാണ് നോക്കിയ D1C ഗോള്‍ഡ് എന്നും ചില റിപ്പോര്‍ട്ടുകളില്‍ പറയുന്നു. കൂടാതെ ഗോള്‍ഡ് വേര്‍ഷന്റെ ഹോം ബട്ടണിലാണ് ഫിങ്കര്‍ പ്രിന്റ് സെന്‍സര്‍ ഉള്ളതെന്നും സൂചനയുണ്ട്.

എല്ലാ വേര്‍ഷനുകളും ഫുള്‍ എച്ച്ഡി ഡിസ്‌പ്ലെയായിരിക്കുമെന്നും ചില ടെക് സൈറ്റുകളില്‍ പറയുന്നു. ഒക്ടാകോര്‍ സ്‌നാപ്ഡ്രാഗണ്‍ 430 പ്രോസസര്‍, അഡ്രീനോ 505 ജിപിയു ഗ്രാഫിക്‌സ്, 32 ജിബി സ്റ്റോറേജ്, 3 ജിബി റാം, ആന്‍ഡ്രോയ്ഡ് ന്യൂഗട്ട്, 13 മെഗാപിക്‌സല്‍ പിന്‍ക്യാമറ, 8 മെഗാപിക്‌സല്‍ സെല്‍ഫി ക്യാമറ എന്നിങ്ങനെയുള്ള ഫീച്ചറുകളും നോക്കിയ ഡി വണ്‍ സിയിലുണ്ടെന്നാണ് വിവരം.