കോംപാക്റ്റ് എസ്‌യുവി സെഗ്മെന്റിലേക്ക് ചെറു വാഹനവുമായി അമേരിക്കൻ വാഹന നിർമാതാക്കളായ ജീപ്പ് എത്തുന്നു. ജീപ്പ് റെനഗേഡ് എന്ന ചെറു എസ്‌യുവിയെയാണ് കമ്പനി ഇന്ത്യയില്‍ എത്തിക്കുന്നത്. അടുത്ത വർഷം വിപണിയിലെത്തുമെന്ന് പ്രതീക്ഷിക്കുന്ന വാഹനത്തിന്റെ വില 10 ലക്ഷത്തിൽ ഒതുക്കാനാവും കമ്പനി ശ്രമിക്കുകയെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.

ജീപ്പ് കോംപസ് നിർമിച്ചിരിക്കുന്ന അതേ പ്ലാറ്റ്ഫോമിൽ തന്നെയായിരിക്കും റെനഗേഡിന്റെ നിര്‍മാണവും നടത്തുക. 4232 എംഎം നീളവും 2022 എംഎം വീതിയായിരിക്കും ഈ എസ്‌യു‌വിക്ക് ഉണ്ടാകുക. ക്രേറ്റയെക്കാൾ 40 എംഎം നീളക്കുറവും 242 എംഎം വീതി കൂടുതലുമാണ് റെനഗേഡിന്. എസ് യു വി സെഗ്മെന്റിൽ‌ ശക്തമായ സാന്നിധ്യത്തിനാണ് കോംപസിലൂടെയും റെനഗേഡിലൂടെയും കമ്പനി ശ്രമിക്കുന്നത്.

കോംപസിൽ ഉപയോഗിക്കുന്ന എൻജിനുകൾ തന്നെയാണ് റെനഗേഡിലുമെങ്കിലും ഇവയുടെ കരുത്തു കുറഞ്ഞ വകഭേദമായിരിക്കുമെന്നാണ് പുറത്തുവരുന്ന റിപ്പോര്‍ട്ടുകള്‍. തുടക്കത്തിൽ 140 ബിഎച്ച്പി കരുത്ത് ഉല്‍പ്പാദിപ്പിക്കുന്ന 2 ലീറ്റർ‌ ഡീസൽ എൻജിനും 1.4 ലീറ്റർ പെട്രോൾ എൻജിനായിരിക്കുമെങ്കിലും അത് പിന്നീട് മാരുതി എസ് ക്രോസിൽ ഉപയോഗിക്കുന്ന 1.6 ലീറ്റർ മൾട്ടി ജെറ്റ് എൻജിനു ഈ വാഹനത്തില്‍ എത്തിയേക്കാമെന്നാണ് സൂചന.

ഹ്യുണ്ടേയ് ക്രേറ്റ, റെനോ ഡസ്റ്റർ എന്നിങ്ങനെയുള്ള വാഹനങ്ങളുമായിട്ടായിരിക്കും റെനഗേഡ് പ്രധാനമായും മത്സരിക്കുക. എസ് യു വിയായ കോംപസ് പുറത്തിറങ്ങിയ ശേഷമായിരിക്കും റെനഗേഡ് വിപണിയില്‍ എത്തുകയെന്നാണ് കമ്പനിയിൽ നിന്ന് ലഭിക്കുന്ന അനൗദ്യോഗിക വിവരങ്ങൾ.