2010ലെ ലോകകപ്പ് ഫുട്ബോളിലേക്കുള്ള യോഗ്യതാ മത്സരത്തില്‍ ജപ്പാനും ഉത്തര കൊറിയയ്ക്കും വിജയം.
ജപ്പാന് മറുപടിയില്ലാത്ത ഒരു ഗോളിന് ബഹ്‌റിനെയും ഉത്തരകൊറിയ മറുപടിയില്ലാത്ത രണ്ട് ഗോളിന് യു‌എ‌ഇയെയും ആണ് പരാജയപ്പെടുത്തിയത്. ‘ നാല്‍പ്പത്തിയേഴാം മിനുട്ടില്‍ ഫ്രീകിക്കിലൂടെ ഷുന്‍സുക്കെ നകാമുറയാണ്‌ ജപ്പാന് വിജയ ഗോള്‍ സമ്മാനിച്ചത്. ഇതോടെ ഗ്രൂപ്പ് തലത്തില്‍ 11 പോയിന്റുമായി ജപ്പാന് ഒന്നാം സ്ഥാനത്തെത്തി. ഗ്രൂപ്പിലെ മറ്റൊരു മല്‍സരത്തില്‍ ഉസ്ബക്കിസ്ഥാന്‍ മറുപടിയില്ലാത്ത നാല് ഗോളുകള്‍ക്ക് ഖത്തറിനെ പരാജയപ്പെടുത്തി.
ഗ്രൂപ്പ് രണ്ടില്‍ ഉത്തര കൊറിയ 2-0നു യുഎഇയെ തോല്‍പ്പിച്ചു. അമ്പത്തിയൊന്നാം മിനുട്ടില്‍ പാക്‌ നാം-ചോലാണ് ഉത്തരകൊറിയയ്ക്ക് മുന്‍‌തൂക്കം നല്‍കിയത്. കളിതീരാന്‍ നിമിഷങ്ങള്‍ മാത്രമുള്ളപ്പോള്‍ മുന്‍ ഇന്‍-ഗുക്‌ രണ്ടാം ഗോളിലൂടെ ഉത്തരകൊറിയയുടെ വിജയം ഒന്നുകൂടി ഉറപ്പിച്ചു. ഇതോടെ പത്തു പോയിന്റുമായി ഉത്തര കൊറിയയും ഗ്രൂപ്പില്‍ ഒന്നാം സ്ഥാനക്കാരായി.
നാലാം ഗ്രൂപ്പില്‍ റഷ്യ അസര്‍ബൈജാനെ തോല്‍പ്പിച്ചു. മറുപടിയില്ലാത്ത രണ്ട് ഗോളുകള്‍ക്കായിരുന്നു റഷ്യയുടെ വിജയവും. ആഫ്രിക്കന്‍ മേഖലയിലെ ആദ്യ മല്‍സരില്‍ ടുണീഷ്യ 2-1 ന്‌ കെനിയയെ കീഴടക്കി.
