ഗോള് മുഖത്തേക്ക് വെടിയുണ്ടകള്‍ പായിക്കുന്ന ലയണല് മെസ്സിയുടെ ഇടതുകാല്‍പ്പാദത്തിന് വില 28.53 കോടിരൂപ. നാല് തവണ ലോകഫുട്‌ബോളറായി തിരഞ്ഞെടുക്കപ്പെട്ട മെസ്സിയോടുള്ള ബഹുമാനാര്‍ഥം ജപ്പാനിലെ ഒരു ജ്വല്ലറിയില്‍ സ്വര്‍ണത്തില്‍തീര്‍ത്ത കാല്‍പ്പാദത്തിനാണ് ഈ വില.
25 കിലോ സ്വര്‍ണത്തിലാണ് ഗിന്‍സ ടന്‍ക്ക എന്ന ജ്വല്ലറി ഉടമ ഈ കാല്‍പ്പാദം നിര്‍മിച്ചത്. കാല്‍പ്പാദത്തിന്റെ യഥാര്‍ഥ അളവുകളില്‍ നിര്‍മിച്ച ഈ സുവര്‍ണപാദത്തില്‍ മെസ്സിയുടെ കൈയൊപ്പും ചാര്‍ത്തിയിട്ടുണ്ട്.
ജപ്പാനില്‍ രണ്ട്‌വര്‍ഷം മുന്‍പ് ഉണ്ടായ സുനാമിയിലും വെള്ളപ്പൊക്കത്തിലും ദുരിതം നേരിട്ടവരെ സഹായിക്കുകയെന്ന ഉദ്ദേശ്യത്തോടെയാണ് ഈ പാദം വില്‍പനയ്ക്കായി തയ്യാറാക്കിയത്. മെസ്സി ഫൗണ്ടേഷന്‍ മുഖേനയാവും സഹായം നല്‍കുക.
