ലോക രണ്ടാം നമ്പര്‍ താരം റാഫെല്‍ നദാലും ചിലിയുടെ ഫെര്‍ണാണ്ടോ ഗോണ്‍സാലസും ഓസ്ട്രേലിയന്‍ ഓപ്പണ്‍ ടെന്നീസിന്‍റെ മൂന്നാം റൌണ്ടിലേക്ക് കടന്നു. രണ്ടാം റൌണ്ടില്‍ ഫ്ലോറന്‍റ് സെറയെ തുരുത്തിയാണ് നദാല്‍ മൂന്നാം റൌണ്ടില്‍ എത്തിയത്. മത്സരത്തില്‍ 6-0, 6-2, 6-2 എന്നതായിരുന്നു നദാലിന്‍റെ സ്കോര്‍.
ഒന്നാം റൌണ്ടില്‍ ബ്രിട്ടീഷ് താരം ആന്‍ഡി മുറേയെ അട്ടിമറിച്ച മികവ് ഫ്രാന്‍സിന്‍റെ ജോ വില്‍ഫ്രഡ് സോംഗാ വീണ്ടും പുറത്തെടുത്തു. ഇത്തവണ സോംഗയ്‌ക്കു മുന്നില്‍ പരാജയപ്പെട്ടത് അമേരിക്കന്‍ താരം സാം വാര്‍ബര്‍ഗായിരുന്നു. അമേരിക്കന്‍ താരത്തെ 6-4, 7-6, 6-2 എന്ന സ്കോറിനാണ് മറിച്ചത്.
ഗ്രീസിന്‍റെ കോണ്‍സ്റ്റാന്‍റിനോസ് എക്കണോമിഡിസിനെ പരാജയപ്പെടുത്തിയാണ് ചിലിയന്‍ താരമായ ഫെര്‍ണാണ്ടോ ഗോണ്‍സാലസ് മുന്നോട്ട് കുതിച്ചത്. 6-4, 7-6, 6-1 എന്ന സ്കോറിനായിരുന്നു ഗോണ്‍സാലസിന്‍റെ ജയം. മൂന്നാം സീഡ് നോവാക്ക് ജോക്കോവിക്കിന്‍റെ കൈക്ക് ഇരയായത് ബെഞ്ചമിന്‍ ബെക്കറായിരുന്നു രണ്ടാം റൌണ്ട് പോരാട്ടത്തില്‍ ബെഞ്ചമിനെ 6- 0, 6-2, 7-6 നു സെര്‍ബിയന്‍ താരം പരാജയപ്പെടുത്തി.
സ്റ്റെഫാന്‍ കൌബക്ക് അഗസ്റ്റിന്‍ കെല്ലാരിയെ 3-6, 6-7, 6-7 എന്ന സ്കോറിനു പരാജയപ്പെടുത്തി. ഗ്വില്ലര്‍മോ ലോപസിന്‍റെ രണ്ടാം റൌണ്ട് ജയം അലക്‍സാന്ദ്രോ ഫെല്ലയ്‌ക്കെതിരെ 6-4, 7-5, 4-6, 6-7 എന്ന സ്കോറുകള്‍ക്കായിരുന്നു. ജര്‍ക്കോ നിയാമാന്‍,മാര്‍ഡി ഫിഷ്, ഇവോ കാര്‍ലോവിക്, പോള്‍ ഹെന്‍‌റി തുടങ്ങിയവരും മൂന്നാം റൌണ്ടില്‍ കടന്നു.
