Reliance Jio Tariff Hike: മൊബൈല്‍ നെറ്റ് വര്‍ക്ക് സേവനങ്ങളുടെ താരിഫ് ഉയര്‍ത്തി റിലയന്‍സ് ജിയോ. ജൂലൈ മൂന്ന് മുതല്‍ പുതിയ താരിഫ് നിലവില്‍ വരും. ജിയോ നെറ്റ് വര്‍ക്കിന്റെ തൊണ്ണൂറ് ശതമാനത്തില്‍ അധികം പ്ലാനുകളുടേയും താരിഫ് ഉയരും. രണ്ടര വര്‍ഷത്തെ ഇടവേളയ്ക്കു ശേഷമാണ് ജിയോ തങ്ങളുടെ സേവനങ്ങള്‍ക്ക് താരിഫ് ഉയര്‍ത്തുന്നത്.

15 രൂപയ്ക്ക് ലഭിച്ചിരുന്ന ഒരു ജിബിയുടെ ഡാറ്റ ഓണ്‍ പാക്കിന് ജൂലൈ മൂന്ന് മുതല്‍ 19 രൂപയായി വര്‍ധിക്കും. 399 രൂപയായിരുന്ന 75 ജിബി പോസ്റ്റ് പെയ്ഡ് ഡാറ്റ പ്ലാനിന് ഇനിമുതല്‍ 449 രൂപ അടയ്ക്കണം. ജിയോയുടെ ഏറ്റവും ജനകീയ പ്ലാനായ 666 രൂപയ്ക്ക് 84 ദിവസം അണ്‍ലിമിറ്റഡ് കോള്‍/നെറ്റ് ഇനി ലഭിക്കണമെങ്കില്‍ 133 രൂപ കൂടുതല്‍ വേണം. 20 ശതമാനം വര്‍ധിപ്പിച്ച് 799 രൂപയാണ് ഈ പ്ലാനിന്റെ പുതിയ താരിഫ്.