ഇങ്ങനെയൊന്നും ആകുമെന്ന് കരുതിയല്ല സജിതയെ വീട്ടില്‍ ഒളിപ്പിച്ചു താമസിപ്പിച്ചതെന്ന് റഹ്മാന്‍. എല്‍ഐസി പൈസ കിട്ടിയാല്‍ എങ്ങോട്ടേലും പോകാമെന്നാണ് കരുതിയത്. ഒരാഴ്ചയെങ്ങാനും ഒളിച്ചുതാമസിപ്പിക്കേണ്ടിവരും. അതു കഴിഞ്ഞ് എല്‍ഐസി പൈസ കിട്ടും. ഇതായിരുന്നു പ്ലാന്‍. പക്ഷേ, അവസാനം ഇങ്ങനെയൊക്കെ ആയെന്നാണ് റഹ്മാന്‍ മാധ്യമങ്ങളോട് വിശദീകരിക്കുന്നത്.

'സജിത വീട്ടിലേക്ക് വരാറുണ്ട്. ഒരിക്കല്‍ സജിത എന്നോട് ഇഷ്ടമാണെന്ന് പറഞ്ഞു. ഞാനും തിരിച്ച് ഇഷ്ടമാണെന്ന് പറഞ്ഞു. ഒരുമിച്ച് ജീവിക്കാന്‍ തയ്യാറെടുപ്പുകള്‍ തുടങ്ങി. ഞാന്‍ അവളെ രഹസ്യമായി താലികെട്ടി. വീട്ടുകാര്‍ സജിതയെ വേറെ വിവാഹത്തിനു നിര്‍ബന്ധിച്ചിരുന്നു. ഞാന്‍ നേരത്തെ താലി ചാര്‍ത്തിയതിനാല്‍ വേറെ വിവാഹം കഴിക്കാന്‍ പറ്റില്ലെന്ന് അവള്‍ പറഞ്ഞു. നമുക്ക് എങ്ങോട്ടേലും പോകാമെന്ന് സജിത എന്നോട് പറഞ്ഞിരുന്നു. എല്‍ഐസി പൈസ കിട്ടാനുണ്ട്. പൈസ കിട്ടിയാല്‍ പോകാം. അതുവരെ ഒളിച്ചുതാമസിക്കാമെന്ന് ഞാന്‍ പറഞ്ഞു. ഒരാഴ്ചയ്ക്ക് വേണ്ടിയാണ് ഒളിപ്പിച്ചുതാമസിപ്പിച്ചത്, ' റഹ്മാന്‍ പറഞ്ഞു