കൂടത്തായ് കൊലപാതക പരമ്പരയിലെ ഒന്നാം പ്രതിയായ ജോളി ജയിലിൽ വെച്ച് ആത്മഹത്യക്ക് ശ്രമിച്ചു.കൈ ഞരമ്പ് മുറിച്ച് ആത്മഹത്യക്ക് ശ്രമിച്ച ജോളിയെ ചികിത്സക്കായി കോഴിക്കോട് മെഡിക്കല്‍ കോളേജിലേക്ക് മാറ്റി. ആദ്യം കോഴിക്കോട് ജില്ലാ ആശുപത്രിയിലേക്കാണ് ജോളിയെ എത്തിച്ചതെങ്കിലും പ്രാഥമിക ചികിത്സ നല്‍കിയ ശേഷം മെഡിക്കല്‍ കോളേജിലേക്ക് മാറ്റുകയായിരുന്നു. ബ്ലയിഡ് ഉപയോഗിച്ചാണ് ആത്മഹത്യക്ക് ശ്രമിച്ചതെന്നും അതല്ല കുപ്പിച്ചില്ല് ഉപയോഗിച്ചാണ് ശ്രമമെന്നും അഭ്യൂഹങ്ങളുണ്ട്. ഇന്ന് പുലർച്ചെ നാലരയോടെയായിരുന്നു ജോളിയുടെ ആത്മഹത്യാശ്രമം.

ഈ കേസിൽ അറസ്റ്റ് ചെയ്യപ്പെട്ട ഘട്ടത്തിലും ജോളി ആത്മഹത്യ പ്രവണത കാണിച്ചിരുന്നു. ഇതിനെ തുടർന്ന് മെഡിക്കല്‍ കോളേജിലെ കൗണ്‍സിലര്‍മാരുടെ സേവനവും തേടിയിരുന്നു.ഞരമ്പ് മുറിക്കാന്‍ ഉപയോഗിച്ച മൂര്‍ച്ചയുള്ള വസ്തു ജോളിയുടെ കൈവശമെത്തിയത് എങ്ങനെയാണെന്ന അന്വേഷണത്തിലാണ് പോലീസ്.
പ്രതിക്ക് ബ്ലയിഡ് പോലുള്ള ഒരു ആയുധം ലഭിച്ചത് ഗുരുതരമായ സുരക്ഷാവീഴ്ചയായാണ് വിലയിരുത്തപ്പെടുന്നത്. ജയിലിലെ മറ്റ് പ്രതികളുടെ സഹായം ജോളിക്ക് ലഭിച്ചിരിക്കാനും സാധ്യതയുണ്ട്. അതേസമയം രക്തം വാര്‍ന്നുപോയെങ്കിലും ജോളിയുടെ പരിക്ക് ഗുരുതരമല്ല എന്നാണ് പുറത്തുവരുന്ന റിപ്പോർട്ട്.