ദേവ്‌ദത്ത് പടിക്കൽ ഇന്ത്യൻ ടീമിലെത്താൻ സാധ്യതയുള്ളതായി സൂചന നൽകി ബിസിസിഐ പ്രസിഡന്റ് സൗരവ് ഗാംഗുലി. മികച്ച കളിക്കാരനാണ് ദേവ്‌ദത്തെന്നും ഒരു ഭാവി ഓപ്പണറെ ദേവ്‌ദത്തിൽ കാണുന്നതായും ഗാംഗുലി സൂചിപിച്ചു.

മിക്ക്ച കളിക്കാരനാണ് ദേവ്‌ദത്ത്. കർണാടകയ്‌ക്കെതിരെ ബംഗാൾ ഈഡൻ ഗാർഡനിൽ കളിച്ചപ്പോൾ ദേവ്‌ദത്തിന്റെ പ്രകടനം ഞാൻ ശ്രദ്ധിച്ചിരുന്നു. ഫാസ്റ്റ് ബൗളിങ്ങിനെതിരെ കളിക്കാനുള്ള സമയവും കഴിവും ദേവ്‌ദത്തിനുണ്ട്. അടുത്ത സീസൺ കൂടി ദേവ്‌ദത്ത് കളിക്കട്ടെ. കാരണം രണ്ടാം സീസൺ കൂടുതൽ കഠിനമാകും. ഇന്ത്യക്ക് ഓപ്പണർമാരെ ആവശ്യമുണ്ട്. ദേവ്‌ദത്തിന് അവിടെ എത്താനാകും എന്ന് പ്രതീക്ഷിക്കാം ഗാംഗുലി പറഞ്ഞു.

ഐപിഎല്ലിലെ തന്റെ ഒന്നാം സീസണിൽ 15 കളികളിൽ നിന്ന് 473 റൺസാണ് ദേവ്‌ദത്ത് നേടിയത്. ആർസിബി നിരയിലെ ടോപ് സ്കോ‌ററും ദേവ്‌ദത്താണ്. സീസണിൽ 5 അർധസെഞ്ചുറികളും ദേവ്‌ദത്ത് കണ്ടെത്തിയിരുന്നു. 51 ഫോറുകളാണ് ഈ സീസണിൽ ദേവ്‌ദത്ത് സ്വന്തമാക്കിയത്.