വര്‍ഷങ്ങള്‍ക്ക് ശേഷം പ്രഭുദേവ വീണ്ടും തമിഴ് സിനിമയില്‍ നായകനായി അഭിനയിക്കുന്നു. എ എല്‍ വിജയ് സംവിധാനം ചെയ്യുന്ന ചിത്രത്തിലാണ് പ്രഭുദേവ നായകനാകുന്നത്. ഒരു തിരക്കഥയുമായി പ്രഭുദേവയെ സമീപിക്കുകയായിരുന്നു വിജയ്. പ്രഭുദേവയ്ക്ക് തിരക്കഥ ഇഷ്ടമായി.

ഒരു നടന്‍ എന്ന നിലയില്‍ ഈ പ്രൊജക്ടിലൂടെ വന്‍ തിരിച്ചുവരവ് നടത്താനാണ് പ്രഭുദേവ ശ്രമിക്കുന്നത്. പ്രകാശ് രാജ് സംവിധാനം ചെയ്ത ധോണി എന്ന ചിത്രത്തിലാണ് പ്രഭുദേവ അവസാനമായി അഭിനയിച്ചത്. താന്‍ സംവിധാനം ചെയ്യുന്ന ചിത്രങ്ങളില്‍ അതിഥിവേഷങ്ങളില്‍ പ്രഭുദേവ എത്താറുണ്ടായിരുന്നു.

കാതലന്‍, മിസ്റ്റര്‍ റോമിയോ, കാതലാ കാതലാ, മിന്‍സാരക്കനവ്, ലവ് ബേര്‍ഡ്സ്, വി ഐ പി തുടങ്ങി ഒട്ടേറെ ഹിറ്റ് ചിത്രങ്ങളില്‍ പ്രഭുദേവ നായകനായിട്ടുണ്ട്. പിന്നീട് അദ്ദേഹം സംവിധാനത്തില്‍ ശ്രദ്ധ കേന്ദ്രീകരിക്കുകയും ബോളിവുഡിലെ ഏറ്റവും താരമൂല്യമുള്ള സംവിധായകനായി മാറുകയും ചെയ്തു.

പ്രഭുദേവ - എ എല്‍ വിജയ് ചിത്രത്തില്‍ നയന്‍‌താര നായികയാകുമോ എന്ന സംസാരം കോളിവുഡില്‍ പരന്നിട്ടുണ്ട്. മുന്‍‌കാമുകനായ ചിമ്പുവിനൊപ്പം നായികയായി അഭിനയിക്കാന്‍ തയ്യാറായ നയന്‍സ്, പ്രഭുദേവയുടെ കാര്യത്തില്‍ ആ നിലപാടെടുക്കുമോ എന്നാണ് തമിഴകം ഉറ്റുനോക്കുന്നത്.

മദ്രാസപ്പട്ടിണം, കിരീടം, ദൈവത്തിരുമകള്‍, തലൈവാ തുടങ്ങിയ ഹിറ്റ് ചിത്രങ്ങള്‍ ഒരുക്കിയ എ എല്‍ വിജയ് ഇപ്പോള്‍ ‘ഇത് എന്ന മായം’ എന്ന സിനിമയുടെ തിരക്കിലാണ്. വിക്രംപ്രഭു നായകനായ ആ‍ സിനിമ പ്രദര്‍ശനത്തിന് തയ്യാറായിക്കഴിഞ്ഞു.