Last Modified വെള്ളി, 12 ഫെബ്രുവരി 2016 (19:34 IST)
ജയറാം തിരിച്ചറിവിന്‍റെ പാതയിലാണ്. ചെയ്യുന്ന സിനിമകളൊക്കെ പരാജയപ്പെട്ടപ്പോള്‍ ഉണ്ടായ തിരിച്ചറിവ്. തന്‍റെ പതിവ് ശൈലിയിലുള്ള കഥകള്‍ക്കും കഥാപാത്രങ്ങള്‍ക്കും ഇനി സ്കോപ്പില്ലെന്ന് മനസിലാക്കിയ താരം ട്രാക്ക് മാറുകയാണ്. അതിന്‍റെ ആദ്യപടിയായിരുന്നു ആടുപുലിയാട്ടം എന്ന ഹൊറര്‍ സിനിമ.
ഇനിയൊരു ആക്ഷന്‍ ചിത്രമാണ് ജയറാം ചെയ്യുന്നത്. എ കെ സാജന്‍ തിരക്കഥയെഴുതുന്ന സിനിമ ദീപന്‍ സംവിധാനം ചെയ്യും. ഈ മാസം അവസാനം ചിത്രീകരണം ആരംഭിക്കുന്ന ചിത്രത്തിന് പേര് നിശ്ചയിച്ചിട്ടില്ല.
നാസര്‍ ഈ ചിത്രത്തില്‍ ഒരു പ്രധാന കഥാപാത്രത്തെ അവതരിപ്പിക്കുന്നു. “എന്‍റെ കരിയറില്‍ ഇതുപോലെ ഒരു ഫുള്‍‌ലെംഗ്ത് ആക്ഷന്‍ ചിത്രം ഞാന്‍ ചെയ്തിട്ടില്ല. ഇപ്പോള്‍ കഥാപാത്രത്തിന്‍റെ വിശദാംശങ്ങള്‍ പറയാന്‍ പറ്റില്ല. ഞാന്‍ ഇതുവരെ ചെയ്തിട്ടുള്ളവയില്‍ നിന്ന് വ്യത്യസ്തമായ കഥാപാത്രമെന്നുമാത്രം പറയാം” - ജയറാം പറയുന്നു.
ദി ഡോള്‍ഫിന്‍സിന് ശേഷം ദീപന്‍ സംവിധാനം ചെയ്യുന്ന ചിത്രമാണിത്. ജയറാം ചിത്രത്തിലൂടെ പുതിയ നിയമത്തിന്‍റെ വിജയം ആവര്‍ത്തിക്കാമെന്ന പ്രതീക്ഷയിലാണ് എ കെ സാജനും.
