പാലക്കുന്നിലെ ജോസൂട്ടി ഓട്ടോ ഡ്രൈവറാണ്. പേരുകേട്ട തറവാട്ടിലെ ആണ്‍‌തരിയാണെങ്കിലും ജോസൂട്ടിക്ക് ഓട്ടോ ഡ്രൈവറുടെ വേഷമണിയേണ്ട സാഹചര്യം വന്നു. സാഹചര്യങ്ങളോട് തോല്‍ക്കാതിരിക്കാന്‍ ജോസൂട്ടി സന്തോഷ പൂര്‍വ്വം ഈ കുപ്പായം എടുത്തണിയുകയായിരുന്നു.
ചെസ്സിന്‍റെ സംവിധായകന്‍ രാജ്‌ബാബുവിന്‍റെ മൂന്നാം സംരംഭമാണ് കങ്കാരു. കോമഡി ചിത്രമായ കങ്കാരുവില്‍ നായകനായ പ്രിഥ്വിരാജിന് ഓട്ടോ ഡ്രൈവറുടെ വേഷമാണ്. ചോക്കളേറ്റിന്‍റെ വിജയത്തിനു ശേഷം പ്രിഥ്വി നായകനാവുന്ന കങ്കാരുവും നിലവാരമുള്ള തമാശ ചിത്രമായിരിക്കുമെന്നാണ് സൂചന.
WD
പാലക്കുന്നില്‍ തറവാട്ടിലെ ഇപ്പോഴത്തെ നില അത്ര മെച്ചമല്ല. അമ്മ, വിവാഹം കഴിക്കാനുള്ള സഹോദരി, മനോ നില തകരാറിലായ സഹോദരന്‍ ഇവരെല്ലാം ജോസൂട്ടിയുടെ വരുമാനത്തെ ആശ്രയിച്ചാണ് കഴിയുന്നത്. സഹോദരി സൂസന്നയെ വിവാഹം കഴിപ്പിച്ച് അയയ്ക്കണമെങ്കില്‍ നല്ലൊരു തുക വേണം.
മൂത്ത സഹോദരിയുടെ ഭര്‍ത്താവാണെങ്കില്‍ ദിവസവും വീട്ടില്‍ കലാപം സൃഷ്ടിക്കുകയും ചെയ്യുന്നു. അയാള്‍ കുടുംബത്ത് ചെലവഴിച്ചതെല്ലാം തിരികെ വേണമെന്നാണ് ആവശ്യം. ഈ സാഹചര്യത്തില്‍ ഓട്ടോയുമായി റോഡിലിറങ്ങുകയല്ലാതെ മറ്റൊരു വഴിയും ജോസൂട്ടിക്ക് മുന്നിലുണ്ടായിരുന്നില്ല.
