Last Modified വ്യാഴം, 31 മാര്‍ച്ച് 2016 (15:22 IST)
ഒരുകാലത്ത് ജയറാം സൂപ്പര്‍താരമായിരുന്നു. മിനിമം ഗ്യാരണ്ടി ജയറാമിന്‍റെ സിനിമകള്‍ക്കുണ്ടായിരുന്നു. കുടുംബങ്ങളിലെയും നാട്ടുമ്പുറത്തെയും കഥകളില്‍ ജയറാം മിന്നിത്തിളങ്ങി. പിന്നീട് ആ സ്പേസിലേക്ക് ദിലീപ് വന്നു. ജയറാമിന്‍റെ സിനിമാ തെരഞ്ഞെടുപ്പുകളില്‍ പാളിച്ചയുണ്ടായി. താരമൂല്യം നഷ്ടമായി. ഇപ്പോള്‍ ബോക്സോഫീസിലോ സാറ്റലൈറ്റിന്‍റെ കാര്യത്തിലോ മൂല്യം തീരെയില്ലാത്ത നടന്‍‌മാരുടെ കൂട്ടത്തിലേക്ക് ജയറാമെത്തി.
എന്നാല്‍ ജയറാം ഇപ്പോള്‍ ഒരു മടങ്ങിവരവിന്‍റെ പാതയിലാണ്. മികച്ച കഥകള്‍ തേടിപ്പിടിച്ച്, ട്രാക്കൊന്ന് മാറ്റിയാണ് ജയറാമിന്‍റെ പരീക്ഷണം. അത്തരത്തില്‍ ആദ്യചിത്രം ആടുപുലിയാട്ടമാണ്. ലുക്കിലെല്ലാം മാറ്റം വരുത്തി, ആക്ഷനും ഹൊററും ഉള്ള സിനിമ. എന്തായാലും ജയറാമിന്‍റെ ലുക്ക് കൊണ്ടും കഥയുടെ പ്രത്യേകതകൊണ്ടും ആടുപുലിയാട്ടം റിലീസിന് മുമ്പേ ശ്രദ്ധേയമായിട്ടുണ്ട്.
ഇനി ജയറാമിന്‍റെതായി വരുന്നത് ‘സത്യ’യാണ്. പൂര്‍ണമായും ഒരു ആക്ഷന്‍ ത്രില്ലര്‍ റോഡ് മൂവി. ദീപന്‍ സംവിധാനം ചെയ്യുന്ന ചിത്രത്തിന് തിരക്കഥയെഴുതുന്നത് ത്രില്ലറുകളുടെ രാജാവ് എ കെ സാജന്‍.
നികിത നായികയാകുന്ന ചിത്രം ജയറാമിന്‍റെ സാഹസികമായ ആക്ഷന്‍ രംഗങ്ങള്‍ കൊണ്ട് സമ്പന്നമായിരിക്കും. ആക്ഷന്‍ സിനിമകളിലൂടെ വീണ്ടും സൂപ്പര്‍താര പദവിയിലേക്ക് എത്താനാണ് ജയറാം ശ്രമിക്കുന്നത്.
ഒരുകാലത്ത് മമ്മൂട്ടിക്കും മോഹന്‍ലാലിനും വെല്ലുവിളിയുയര്‍ത്തി തുടര്‍ വിജയങ്ങള്‍ സൃഷ്ടിച്ച് സൂപ്പര്‍താരമായ ആളാണ് ജയറാം. വീണ്ടും രണ്ടും കല്‍പ്പിച്ചുള്ള ജയറാമിന്‍റെ വരവ് മമ്മൂട്ടിക്കും മോഹന്‍ലാലിനും വെല്ലുവിളിയാകുമോ എന്ന് കാത്തിരിക്കുകയാണ് സിനിമാലോകം.
