രജനി ആരാധകര്‍ക്ക് സന്തോഷവാര്‍ത്ത. ഇന്ത്യന്‍ സിനിമയിലെ എക്കാലത്തെയും വലിയ ഹിറ്റായ ‘യന്തിരന്’ വീണ്ടുമെത്തുകയാണ്. യന്തിരന് - 2ന്‍റെ തിരക്കഥാ രചന ഷങ്കര് ആരംഭിച്ചതായാണ് റിപ്പോര്‍ട്ടുകള്‍. രജനീകാന്ത് നായകനാകുന്ന സിനിമ സണ് പിക്ചേഴ്സ് നിര്‍മ്മിക്കും.
യന്തിരന്‍റെ ക്യാമറാമാനായ രത്നവേലുവാണ് ഇതുസംബന്ധിച്ച കൂടുതല്‍ വിവരങ്ങള്‍ പുറത്തുവിട്ടത്. “യന്തിരന്‍റെ രണ്ടാം ഭാഗത്തിനായുള്ള ചര്‍ച്ചകള്‍ ആരംഭിച്ചു. രജനീകാന്ത്, ഷങ്കര്, എ ആര്‍ റഹ്‌മാന്‍ എന്നിവര്‍ തന്നെയായിരിക്കും ചിത്രത്തിന് പിന്നില്‍. ഞാനായിരിക്കും ക്യാമറാമാന്‍. യന്തിരന്‍റെ മറ്റ് അണിയറപ്രവര്‍ത്തകരെല്ലാം പുതിയ ചിത്രത്തിന് പിന്നിലും ഉണ്ടാകും. ഷങ്കര് ഇതിന്‍റെ തിരക്കഥ രചിച്ചുകൊണ്ടിരിക്കുകയാണ്” - രത്നവേലു പറഞ്ഞു.
എന്നാല്‍, അടുത്ത വര്‍ഷം മാത്രമേ ഈ സിനിമയുടെ ചിത്രീകരണം ആരംഭിക്കുകയുള്ളൂ എന്നാണ് സൂചന. കാരണം ത്രീ ഇഡിയറ്റ്സിന്‍റെ തമിഴ് റീമേക്കിന്‍റെ പണിപ്പുരയിലാണ് ഷങ്കര് ഇപ്പോള്‍. രജനീകാന്താകട്ടെ കെ എസ് രവികുമാര്‍ സംവിധാനം ചെയ്യുന്ന ‘റാണ’യുടെ തിരക്കിലും.
എന്തായാലും യന്തിരന് രണ്ടാം ഭാഗം വരുന്നു എന്ന വാര്‍ത്ത കോളിവുഡിലാകെ ഉണര്‍വുണ്ടാക്കിയിട്ടുണ്ട്.
