മോഹന്‍ലാലിന് മമ്മൂട്ടിയുടെ മറുപടി - കോട്ടയം ബ്രദേഴ്സ്!
WEBDUNIA|
PRO
ക്രിസ്ത്യന്‍ ബ്രദേഴ്സ് വന്‍ ഹിറ്റായി മാറുകയാണ്. അങ്ങനെ മോഹന്‍ലാല്‍ ഈ വര്‍ഷത്തെ തന്‍റെ ആദ്യ മെഗാഹിറ്റ് സ്വന്തമാക്കി. പിന്നാലെയെത്തിയ ചൈനാ ടൌണും വിജയത്തിലേക്ക് കുതിക്കുന്നു. അതേസമയം, മമ്മൂട്ടിയുടെ ആഗസ്റ്റ് 15, ഡബിള്‍സ് എന്നിവ അത്ര നല്ല സ്ഥിതിയിലല്ല. ഒരു വലിയ വിജയം അനിവാര്യമായിരിക്കുന്ന സാഹചര്യത്തില്‍ മമ്മൂട്ടി വലിയൊരു മൂവ് നടത്തുകയാണ്. ഒരു പുതിയ പ്രൊജക്ട് - കോട്ടയം ബ്രദേഴ്സ്! മോഹന്‍ലാലിന്‍റെ ക്രിസ്ത്യന്‍ ബ്രദേഴ്സിന് ഒരു മറുപടിയാണ് ഈ ടൈറ്റിലിലൂടെ മമ്മൂട്ടി ഉദ്ദേശിക്കുന്നതെന്ന് വ്യക്തം.
മമ്മൂട്ടിക്കൊപ്പം മലയാളത്തിലെ പ്രമുഖ നായകന്മാരും അണിനിരക്കുന്ന സിനിമയുടെ സംവിധായകന്‍ ലാല് ആണ്. ലാല് ഒറ്റയ്ക്ക് സംവിധാനം ചെയ്യുന്ന ആദ്യ സൂപ്പര്‍താരചിത്രമായിരിക്കും കോട്ടയം ബ്രദേഴ്സ്. ലാല് ക്രിയേഷന്‍സ് നിര്‍മ്മിച്ച് ലാല് റിലീസ് വിതരണത്തിനെത്തിക്കുന്ന ഈ സിനിമ മമ്മൂട്ടിയുടെ ക്രിസ്മസ് ചിത്രമായി പ്രദര്‍ശനത്തിനെത്തും.
ഹിറ്റ്ലര്‍, ബ്ലാക്ക്, തൊമ്മനും മക്കളും, പോത്തന്‍‌വാവ എന്നീ സിനിമകള്‍ മമ്മൂട്ടിയെ നായകനാക്കി ലാല് നിര്‍മ്മിച്ചിട്ടുണ്ട്. ആദ്യമായാണ് മമ്മൂട്ടിച്ചിത്രം സംവിധാനം ചെയ്യാനൊരുങ്ങുന്നത്. ഒരു കം‌പ്ലീറ്റ് എന്‍റര്‍ടെയ്‌നറാണ് ലാലിന്റെ ലക്‍ഷ്യം, മമ്മൂട്ടിയുടെയും.
ലാലിന്റെ കഴിഞ്ഞ ചിത്രമായ ‘ടൂര്‍ണമെന്‍റ്’ പരാജയമായിരുന്നു. വ്യത്യസ്തമായ പ്രമേയവും ട്രീറ്റുമെന്‍റും ആയിരുന്നെങ്കിലും ടൂര്‍ണമെന്‍റ് പരാജയപ്പെടാന്‍ കാരണം തിരക്കഥയിലെ പാളിച്ചകളായിരുന്നു. തിടുക്കപ്പെട്ട് തിരക്കഥ തയ്യാറാക്കിയതാണ് ആ സിനിമയ്ക്ക് വിനയായയത്. അതുകൊണ്ടുതന്നെ കോട്ടയം ബ്രദേഴ്സിന് ഏറെ സമയമെടുത്താണ് തിരക്കഥ തയ്യാറാക്കുന്നത്.
സിദ്ദിഖുമായി പിരിഞ്ഞതിന് ശേഷം അഭിനയത്തിലും നിര്‍മ്മാണത്തിലും ശ്രദ്ധ കേന്ദ്രീകരിച്ചിരുന്ന ലാല് ‘ടു ഹരിഹര്‍ നഗര്‍’ എന്ന മെഗാഹിറ്റിലൂടെയാണ് സംവിധാനരംഗത്ത് തിരിച്ചെത്തിയത്. ഇന്‍ ഗോസ്റ്റ് ഹൌസ് ഇന്‍ എന്ന ചിത്രത്തിലൂടെ വിജയം ആവര്‍ത്തിക്കാനും ലാലിന് കഴിഞ്ഞു.
