രാവണന്‍ എന്ന ഫ്ലോപ്പിന് ശേഷം മണിരത്നം സംവിധാനം ചെയ്യുന്ന ‘കടല്’ ഒരു പ്രണയകഥയാണ് പറയുന്നത്. തമിഴ്താരം കാര്‍ത്തിക്കിന്‍റെ മകന്‍ ഗൌതം ആണ് നായകന്‍. നായിക പഴയകാല നായിക രാധയുടെ മകള്‍ തുളസി. ഒരു കടലോരഗ്രാമത്തിന്‍റെ പശ്ചാത്തലത്തില്‍ കഥ പറയുന്ന ചിത്രത്തിന്‍റെ സംഗീതം എ ആര് റഹ്മാന്. ഛായാഗ്രഹണം രാജീവ് മേനോന്‍.
ഈ സിനിമയെക്കുറിച്ചുള്ള പുതിയ വാര്‍ത്ത ലഭിച്ചിരിക്കുന്നു. ‘കടല്’ ഒരുങ്ങുന്നത് അമ്പത് കോടി രൂപ ചെലവിട്ടാണത്രെ. കോളിവുഡില്‍ ഇത് വലിയ ചര്‍ച്ചാ വിഷയമായിരിക്കുകയാണ്. സൂപ്പര്‍താരങ്ങളില്ലാത്ത ഒരു ചെറിയ ലൌസ്റ്റോറി. അര്‍ജുനും അരവിന്ദ് സ്വാമിയുമാണ് എടുത്തുപറയാവുന്ന താരങ്ങള്‍. വിദേശ ലൊക്കേഷനുകളില്ല. തൂത്തുക്കുടിയിലും ആലപ്പുഴയിലുമൊക്കെയാണ് ചിത്രീകരണം. എ ആര് റഹ്മാന് മാത്രമാണ് ഒരു വലിയ സാന്നിധ്യം എന്നുപറയാവുന്നത്. എന്നാല്‍ മണിരത്നം ചിത്രങ്ങള്‍ക്ക് റഹ്മാന് വലിയ തുക പ്രതിഫലമായി വാങ്ങാറില്ല. പിന്നെങ്ങനെയാണ് ഈ സിനിമയ്ക്ക് 50 കോടി രൂപ ചെലവാകുക?
മണിരത്നം തന്നെ നിര്‍മ്മിക്കുന്ന ചിത്രത്തിന്‍റെ സഹരചയിതാവ് ജയമോഹനാണ്. “അമ്പത് കോടി രൂപയാണ് കടലിന്‍റെ ബജറ്റ്. അതുകൊണ്ടുതന്നെ ഇതിന്‍റെ രചനാഘട്ടത്തില്‍ ഒരുപാട് ക്രിയേറ്റീവ് ഫ്രീഡം അനുഭവിക്കാനാകുന്നു” - ജയമോഹന്‍ വ്യക്തമാക്കി.
തമിഴിലും തെലുങ്കിലുമായാണ് ‘കടല്’ നിര്‍മ്മിക്കുന്നത്. എന്തായാലും ഒരു കൊച്ചു പ്രണയകഥ വലിയ ബജറ്റില്‍ ഒരുങ്ങുമ്പോള്‍ അതിന് അതിന്‍റേതായ മിഴിവുണ്ടാകുമെന്ന് തീര്‍ച്ച. അലൈപായുതേ പോലെ മറ്റൊരു പ്രണയകാവ്യമായിരിക്കട്ടെ കടല് എന്ന് ആശംസിക്കുന്നു.
