മലയാള സിനിമയില്‍ ‘ബെഡ് വിത്ത് ആക്‍ടിംഗ്’ എന്ന പാക്കേജ് സംവിധാനത്തിന് സമ്മതമാണെങ്കില്‍ അവസരം നല്‍കാമെന്ന് ചിലര്‍ പറഞ്ഞിട്ടുണ്ടെന്ന് നടി ഹിമ ശങ്കര്‍. സ്കൂള്‍ ഓഫ് ഡ്രാമയിലെ പഠനകാലത്താണ് ഇതുണ്ടായതെന്നും ഹിമ വെളിപ്പെടുത്തി.

ഇങ്ങനെ ഒരു പാക്കേജ് സംവിധാനമുണ്ടെന്നുതന്നെ അപ്പോഴാണ് കേള്‍ക്കുന്നത്. ആ പ്രയോഗം ആദ്യം കേട്ടപ്പോള്‍ അതെന്താണെന്ന് വിളിച്ചയാളോടുതന്നെ അന്വേഷിച്ചു. അപ്പോഴാണ് അത് ‘ബെഡ് വിത്ത് ആക്ടിംഗ്’ ആണെന്ന് അയാള്‍ വെളിപ്പെടുത്തിയത് - ഹിമ പറഞ്ഞു.

ബെഡ് വിത്ത് ആക്ടിംഗ് എന്ന പാക്കേജ് സംവിധാനം മലയാള സിനിമയില്‍ നിലനില്‍ക്കുന്നുണ്ട്. ഇക്കാര്യം പറഞ്ഞ് സമീപിച്ച മൂന്നുപേരോട് പറ്റില്ല എന്നുപറഞ്ഞിട്ടുണ്ട്. അതിനുശേഷം അങ്ങനെയൊരു വിളി വന്നിട്ടില്ല. ഒരു ആക്ടിവിസ്റ്റിന്‍റെ മുഖമുള്ളതുകൊണ്ടാകാം ഇപ്പോള്‍ അത്തരക്കാരുടെ ശല്യം ഇല്ലാത്തതെന്നും ഹിമ പറയുന്നു.