മലയാള സിനിമയിലെ ബെസ്റ്റ് കപ്പിള്‍സില്‍ ഒന്നായിരുന്നു പ്രിയദര്‍ശന്‍ - ലിസി. എന്നാല്‍, അടുത്തിടെയാണ് ഇരുവരും വേര്‍പിരിഞ്ഞത്. പിരിഞ്ഞെങ്കിലും തങ്ങള്‍ ഇപ്പോഴും നല്ല സുഹൃത്തുക്കള്‍ തന്നെയാണെന്ന് പ്രിയദര്‍ശന്‍ പലതവണ വ്യക്തമാക്കിയിട്ടുണ്ട്. എന്നാല്‍, പ്രിയദര്‍ശന്‍ ഇപ്പോഴും ലിസിയെ പിരിഞ്ഞതിന്റെ നഷ്ടബോധത്തില്‍ നിന്നും കരകയറിയിട്ടില്ലെന്നാണ് വ്യക്തമാകുന്നത്.

ലിസിയുടെ ഓര്‍മകളില്‍ തന്നെയാണ് പ്രിയദര്‍ശന്‍ എന്ന് സംവിധായകന്റെ ഒടുവിലത്തെ അഭിമുഖത്തില്‍ നിന്നും വ്യക്തമാകുന്നുണ്ട്. ഏറ്റവുമൊടുവില്‍ ഒരു മാഗസിന് നല്‍കിയ അഭിമുഖത്തിലും പ്രിയദര്‍ശന്‍ സംസാരിക്കുന്നത് ലിസിയെ കുറിച്ചും ലിസിയോടുണ്ടായിരുന്ന പ്രണയത്തെ കുറിച്ചുമാണ്.

ലിസിയല്ലാതെ എന്റെ ജീവിതത്തില്‍ ഇനി മറ്റൊരു പെണ്ണില്ല. വിവാഹം കഴിഞ്ഞതിന് ശേഷമാണ് ഞാന്‍ ലിസിയെ പ്രണയിച്ചു തുടങ്ങിയത്. ഇക്കാര്യം ഒരിക്കല്‍ ഞാന്‍ ലിസിയോട് തുറന്നുപറഞ്ഞിട്ടുമുണ്ട്. വിവാഹ ശേഷം അമ്മുവിന്റെ മുഖം കണ്ടതിന് ശേഷമാണ് ഞാന്‍ ലിസിയുമായി അഗാധ പ്രണയത്തിലായത്. - പ്രിയദര്‍ശന്‍ പറയുന്നു.

1990 കളില്‍ സിനിമയിലുണ്ടായിരുന്ന മനോഹരികളായ സ്ത്രീകള്‍ക്കൊപ്പം ഞാന്‍ ജോലി ചെയ്തിട്ടുണ്ട്. അന്തസ്സായിട്ട് പറയാം, എന്നെ കുറിച്ച് ഒരപവാദവും ഒരു പത്രവും ഇന്നുവരെ വന്നിട്ടില്ലെന്ന് പ്രിയദര്‍ശന്‍ പറയുന്നു. തന്റെ മനസ്സില്‍ ഇനിയും ഒരു സ്വപ്‌നമുണ്ടെന്നും അത് വേര്‍പിരിഞ്ഞ തന്റെ ഭാര്യ ലിസിയും അമ്മുവും ചന്തുവും ഒരുമിച്ച് ജീവിയ്ക്കുന്ന വീടാണെന്നും പ്രിയന്‍ പറയുന്നു. രണ്ടുപേരുടെയും ഈഗോയില്‍ അവസാനിച്ചതാണ് എല്ലാമെന്നും പ്രിയദര്‍ശന്‍ വ്യക്തമാക്കുന്നുണ്ട്.