Last Modified ചൊവ്വ, 7 ജൂണ്‍ 2016 (15:54 IST)
ആദ്യദിന കളക്ഷന്‍ ഒരു അത്ഭുതമാണെന്ന് തോന്നിത്തുടങ്ങിയത് മോഹന്‍ലാലിന്‍റെ ‘കാസനോവ’ റിലീസായതുമുതലാണ്. രണ്ടുകോടി ആറുലക്ഷം രൂപയായിരുന്നു ആ സിനിമയുടെ ആദ്യദിന കളക്ഷന്‍. അതുവരെ ആദ്യദിനത്തില്‍ രണ്ടുകോടിക്ക് മേല്‍ കളക്ഷന്‍ നേടാന്‍ ഒരു സിനിമയ്ക്കും കഴിഞ്ഞിരുന്നില്ല.
പിന്നീട് മോഹന്‍ലാലിന്‍റെ ലോഹം 2.14 കോടി രൂപയാണ് ആദ്യദിനത്തില്‍ സ്വന്തമാക്കിയത്. എന്നാല്‍ മോഹന്‍ലാലിന്‍റെ ഈ റെക്കോര്‍ഡുകള്‍ തകര്‍ത്തെറിഞ്ഞുകൊണ്ട് യുവസൂപ്പര്‍താരം സുല്‍ക്കര്‍ സല്‍മാന്‍ കൊടുങ്കാറ്റായി. ദുല്‍ക്കറിന്‍റെ ‘ചാര്‍ലി’ ആദ്യദിനത്തില്‍ 2.18 കോടിയും ‘കലി’ ആദ്യദിനത്തില്‍ 2.33 കോടിയും കളക്ഷന്‍ നേടി.
എന്നാല്‍ മോഹന്‍ലാലും ദുല്‍ക്കറും തമ്മിലുള്ള ഈ മത്സരം ഇവിടെ ഒത്തുതീര്‍ക്കാം. കാരണം, മാസ് സിനിമകളുടെ തമ്പുരാനായ സാക്ഷാല്‍ മമ്മൂട്ടി ജൂലൈ ഏഴിന് ‘കസബ’യുമായി വരുന്നുണ്ട്. കേരളത്തില്‍ മാത്രം 150 തിയേറ്ററുകളിലാണ് ചിത്രം റിലീസ് ചെയ്യുന്നത്.
മോഹന്‍ലാലിന്‍റെയും ദുല്‍ക്കറിന്‍റെയും ഈ ആദ്യദിന റെക്കോര്‍ഡൊക്കെ
കസബ വരുന്നതുവരെയേ നിലനില്‍ക്കുള്ളൂ എന്നാണ് മമ്മൂട്ടി ആരാധകരുടെ അഭിപ്രായം.
കസബയില്‍ രാജന്‍ സക്കറിയ എന്ന തകര്‍പ്പന്‍ പൊലീസ് ഓഫീസറായി മമ്മൂട്ടി വരുമ്പോള്‍ കളക്ഷന്‍ റെക്കോര്‍ഡുകളെല്ലാം പഴങ്കഥയാകുമെന്നാണ് പ്രതീക്ഷ. വരലക്ഷ്മി ശരത്കുമാര്‍ നായികയാകുന്ന കസബ നിതിന്‍ രണ്‍ജിപണിക്കരാണ് സംവിധാനം ചെയ്യുന്നത്.
