Last Updated:
ശനി, 5 ജൂലൈ 2014 (11:37 IST)
ഷങ്കര്‍ സംവിധാനം ചെയ്യുന്ന വിക്രം ചിത്രം 'ഐ' എന്ന് പ്രദര്‍ശനത്തിനെത്തുമെന്ന ചോദ്യം കഴിഞ്ഞ ദിവസം വരെ കോളിവുഡിനെ അസ്വസ്ഥമാക്കിയിരുന്നു. എന്നാല്‍ ഇപ്പോള്‍ ഒരുത്തരം ലഭിച്ചിരിക്കുന്നു - ഏവരും കാത്തിരിക്കുന്ന 'ഐ' സെപ്റ്റംബറില്‍ പ്രദര്‍ശനത്തിനെത്തും.
വിക്രം - എമി ജാക്സണ്‍ ജോഡിയുടെ ഈ റൊമാന്‍റിക് ത്രില്ലര്‍ യഥാര്‍ത്ഥത്തില്‍ ഒരു മെഡിക്കല്‍ ത്രില്ലറാണെന്നാണ് ഒടുവില്‍ ലഭിക്കുന്ന വിവരം. മരുന്ന് മാഫിയയുടെ പശ്ചാത്തലത്തിലാണ് ഈ സിനിമയുടെ കഥ വികസിക്കുന്നതത്രേ. മുമ്പ് 'മാട്രാന്‍' എന്ന സൂര്യച്ചിത്രം സമാനമായ കഥ പറഞ്ഞിരുന്നു.
ഓഗസ്റ്റിലാണ് ഐയുടെ ഓഡിയോ റിലീസ് പ്ലാന്‍ ചെയ്തിരിക്കുന്നത്. കഴിഞ്ഞ ദിവസം എ ആര്‍ റഹ്‌മാന്‍ ഐയിലെ പാട്ടുകളുടെ മാസ്റ്റര്‍ കോപ്പി സോണി മ്യൂസിക്കിന് കൈമാറി. ഒരു ഗാനം പാടിയിരിക്കുന്നത് സംഗീത സംവിധായകന്‍ അനിരുദ്ധാണ്.
ചൈനയിലാണ് 'ഐ'യുടെ ഭൂരിപക്ഷം ഭാഗങ്ങളും ചിത്രീകരിച്ചിരിക്കുന്നത്. സുരേഷ്ഗോപിയും ഉപന്‍ പട്ടേലുമാണ് പ്രധാന വില്ലന്‍‌മാര്‍. ആസ്കാര്‍ രവിചന്ദ്രനാണ്
ഐ നിര്‍മ്മിക്കുന്നത്. 150 കോടി രൂപയാണ് ചിത്രത്തിന്‍റെ ബജറ്റെന്നാണ് റിപ്പോര്‍ട്ടുകള്‍.
