ഭാവന ഇപ്പോള്‍ സിനിമകള്‍ കുറച്ചിരിക്കുന്നു എന്നത് സത്യമാണ്. അത് നല്ല കഥാപാത്രങ്ങള്‍ ലഭിക്കാത്തതുകൊണ്ടാണ്. വര്‍ഷങ്ങളായി ചെയ്തുകൊണ്ടിരിക്കുന്നതുതന്നെ വീണ്ടും ചെയ്യുന്നതില്‍ താല്‍പ്പര്യമില്ലാത്തതിനാല്‍ നല്ല സിനിമകള്‍ മാത്രം ചെയ്താല്‍ മതിയെന്നാണ് ഭാവന തീരുമാനിച്ചിരിക്കുന്നത്. അടുത്തിടെ വിഷ്ണു രാഘവ് സംവിധാനം ചെയ്ത ഒരു ഷോര്‍ട്ട് ഫിലിമില്‍ നല്ലൊരു കഥാപാത്രത്തെ ലഭിച്ചപ്പോള്‍ സന്തോഷത്തോടെ അത് ചെയ്തു ഭാവന.

ആസിഫ് അലി നിര്‍മ്മിച്ച് നായകവേഷം ചെയ്യുന്ന ‘കോഹിനൂര്‍’ എന്ന ചിത്രത്തില്‍ ഭാവന ഒരു ഐറ്റം ഡാന്‍സ് ചെയ്യുന്നതായി വാര്‍ത്തകള്‍ വന്നിരുന്നു. എന്നാല്‍ അക്കാര്യത്തില്‍ ഒരു യാഥാര്‍ത്ഥ്യവുമില്ലെന്ന് സിനിമയുടെ അണിയറപ്രവര്‍ത്തകര്‍ തന്നെ അറിയിച്ചിരിക്കുന്നു. ഈ സിനിമയില്‍ ഐറ്റം ഡാന്‍സേ ഇല്ല, പിന്നല്ലേ അത് ഭാവന ചെയ്യും എന്ന വാര്‍ത്ത !

ഭാവന ഈ സിനിമയില്‍ അതിഥി വേഷത്തില്‍ അഭിനയിക്കുന്നുണ്ട്. ഒരു ഗാനരംഗത്ത് പ്രത്യക്ഷപ്പെടുന്നുമുണ്ട്. ആസിഫ് അലി അവതരിപ്പിക്കുന്ന കഥാപാത്രത്തിന്‍റെ മുന്‍ കാമുകിയായാണ് ഭാവന ഈ സിനിമയില്‍ വേഷമിടുന്നത്. ഒരു വെഡ്ഡിംഗ് സോംഗ് സീക്വന്‍സില്‍ പ്രത്യക്ഷപ്പെടുന്നുമുണ്ട്.

‘കിളിപോയി’ എന്ന ചിത്രത്തിന് ശേഷം വിനയ് ഗോവിന്ദ് സംവിധാനം ചെയ്യുന്ന ചിത്രമാണ് കോഹിനൂര്‍. രഞ്ജീത് കമലാ ശങ്കറും സലില്‍ മേനോനും ചേര്‍ന്നാണ് ചിത്രത്തിന് തിരക്കഥയെഴുതുന്നത്. ഇന്ദ്രജിത്ത്, അജു വര്‍ഗീസ്, ചെമ്പന്‍, വിനയ് ഫോര്‍ട്ട് തുടങ്ങിയവര്‍ അഭിനയിക്കുന്നു. പുതുമുഖം അപര്‍ണ വിനോദ് ആണ് നായിക.