യുവതാരങ്ങളില്‍ പൃഥ്വിരാജിന് ശക്തമായ വെല്ലുവിളി ഉയര്‍ത്തുന്ന താരം ആരാണ്? ‘ആസിഫ് അലി’ എന്ന് സംശയമേതുമില്ലാതെ ആരും പറയും. പൃഥ്വിരാജിനെപ്പോലെ സ്ട്രോംഗ് ക്യാരക്ടറുകള്‍ ചെയ്യാന്‍ കഴിയുന്ന നടനായി ആസിഫ് മാറി. മാത്രമല്ല, പൃഥ്വിയെപ്പോലെ ആസിഫിന് ഫാന്‍സ് ഏറെയാണ്. ഈയിടെ പൃഥ്വിയുമായി ചെറിയ ‘വാക്പോര്’ നടത്തിയും ആസിഫ് തന്‍റെ പൊട്ടന്‍ഷ്യല്‍ തെളിയിച്ചു.
എന്നാല്‍ പൃഥ്വിയും ആസിഫും തമ്മില്‍ ശത്രുതയൊന്നുമില്ലെന്ന് തെളിയിക്കുന്നതായിരുന്നു ‘ഇന്ത്യന് റുപ്പി’ എന്ന സിനിമ. പൃഥ്വിരാജ് നായകനായ സിനിമയില്‍ അതിഥിവേഷം ചെയ്യാന്‍ ആസിഫ് തയ്യാറായി. എന്നാല്‍ ഇരുവരും നായകന്മാരായി വരുന്ന ഒരു സിനിമ എന്നുവരും എന്ന് അപ്പോഴും ചോദ്യം ബാക്കിനിന്നു.
അമല് നീരദ് തന്‍റെ ‘ബാച്ച്ലര് പാര്ട്ടി’യുടെ സ്റ്റാര്‍ കാസ്റ്റ് പ്രഖ്യാപിച്ചപ്പോള്‍ ആവേശം കൊള്ളിക്കുന്ന ഒരു ന്യൂസ് അതിലുണ്ടായിരുന്നു. പൃഥ്വിരാജും ആസിഫ് അലിയും ചിത്രത്തില്‍ അഭിനയിക്കുന്നു എന്നതായിരുന്നു അത്. ഇരുവര്‍ക്കും നായകന്മാരായി വിലസാന്‍, അഭിനയിച്ച് മത്സരിക്കാനുള്ള സിനിമയായി ബാച്ച്ലര് പാര്ട്ടി മാറുമെന്നായിരുന്നു പ്രതീക്ഷ. എന്നാല്‍ അത്തരം ഒരു ഏറ്റുമുട്ടല്‍ ഉണ്ടാകില്ലെന്നാണ് പുതിയ റിപ്പോര്‍ട്ട്.
ബാച്ച്ലര് പാര്‍ട്ടിയില്‍ പൃഥ്വിരാജ് അതിഥിവേഷത്തിലാണത്രെ. അതായത്, ഇന്ത്യന് റുപ്പിയില്‍ ആസിഫ് അലി ഗസ്റ്റ് റോള്‍ ചെയ്തതിനുള്ള പൃഥ്വിരാജിന്‍റെ പ്രത്യുപകാരം. മിനിറ്റുകള്‍ മാത്രം ദൈര്‍ഘ്യമുള്ള ഒരു റോളില്‍ വന്നുപോകുന്ന കഥാപാത്രമാണത്രെ പൃഥ്വിക്ക്. പൃഥ്വിയും ആസിഫും ഒന്നിച്ച് ഒരു സീന്‍ ഉണ്ടാകുമോ എന്നുപോലും സംശയം.
എന്തായാലും ബിഗ്സ്റ്റാറും സ്റ്റാര്‍ പ്രിന്‍സും തമ്മില്‍ അഭിനയത്തിന്‍റെ കാര്യത്തിലും താരപ്പകിട്ടിന്‍റെ കാര്യത്തിലും മാറ്റുരയ്ക്കുന്ന ഒരു സിനിമയ്ക്കായി പ്രേക്ഷകര്‍ ഇനിയും കാത്തിരിക്കണമെന്ന് സാ‍രം.
